SRG SSR il 2024 cun in resultat annual equilibrà

L'onn 2024 è stà marcà tranter auter da dus gronds eveniments da sport: ils gieus olimpics da stad a Paris ed il Campiunadi europeic da ballape en Germania. Cun la purschida multifara da televisiun en connex cun ils gieus olimpics ha la SRG SSR cuntanschì quatter milliuns aspectaturas ed aspectaturs en tut la Svizra. En pli hai dà var 30 milliuns visits sin ils chanals digitals e 17 milliuns starts da livestreams. Politicamain èn l’elecziun da presidi en ils Stadis Unids sco er ils conflicts che cuzzan anc adina en l’Ucraina ed il Proxim Orient stats en il focus. Culturalmain ha cunzunt la victoria svizra a l’Eurovision Song Contest a Malmö muventà. Entras quai è l’occurrenza gronda cun radiaziun internaziunala il 2025 a Basilea. 

Diever pli e pli digital 

Il diever dals cuntegns da la SRG SSR resta constantamain fitg aut: 83 pertschient da la populaziun a partir da 15 onns en Svizra dovra almain ina giada per emna ina purschida da la SRG SSR al radio ed en la televisiun, sin paginas d'internet ubain via apps e plattafurmas da social media. I sa mussa ina clera tendenza da nizzegiar purschidas digitalas, spezialmain tar il public pli giuven: la cumpart da las persunas tranter 15 e 34 onns ch'inditgeschan da duvrar mo pli ils chanals digitals da la SRG SSR è creschida l'onn passà da 12 sin passa 22 pertschient. Sur tut las gruppas da vegliadetgna è questa quota sa dublada da 6 sin 12 pertschient. Passa 60 pertschient da la populaziun nizzegia ils cuntegns da la SRG SSR almain per part a moda digitala. 

Resultat annual equilibrà 

La SRG SSR cuntanscha cun in retgav da gestiun dad 1,56 milliardas francs in resultat equilibrà da 15,3 milliuns francs. Quai correspunda ad in pertschient dal retgav da gestiun. Il retgav da gestiun dal 2024 è s'augmentà per 17,8 milliuns francs en cumparegliaziun cun l'onn precedent. Quai è cunzunt d'attribuir a la cumpensaziun da chareschia sin la taxa da medias – pajada per l'ultima giada cumplainamain – da var 70 milliuns francs. Cumpareglià cun l'onn precedent èn las expensas da manaschi per 38,8 milliuns francs pli autas. Il motiv principal è in effect spezial da l'onn passà pervi da l'annullaziun d'ina rectificaziun da la valur da las reservas da las contribuziuns dal patrun en l'autezza da 35 milliuns francs. Senza quest effect spezial fissan las expensas da manaschi da la SRG SSR s'augmentadas per 3,8 milliuns francs resp. per 0,25 pertschient. 

Retgav commerzial stabil ed ulteriur retgav da gestiun 

Il retgav commerzial importa 207,8 milliuns francs ed è uschia sa reducì per 1,8 milliuns francs. Grazia als gronds eveniments da sport menziunads han ins praticamain pudì tegnair sin in nivel stabil las entradas da la reclama. Ils retgavs da sponsoring èn vinavant regressivs. Ils ulteriurs retgavs da gestiun èn medemamain stabils. Quels cumpiglian contribuziuns federalas en favur dal mandat per l'exteriur, entradas da locaziun da bains immobigliars e retgavs da producziun da terzs. Il trend da plirs onns areguard las entradas commerzialas regredescha però ferm. 

Expensas supplementaras per la cybersecurity e la protecziun da datas 

Ils custs da persunal importan cun 55,3 pertschient passa la mesadad dals custs totals da la SRG SSR. En cumparegliaziun cun l'onn passà èn els s'augmentads per 58,7 milliuns francs. Il motiv principal: l'onn passà è vegnida annullada la rectificaziun da la valur sin las reservas da las contribuziuns dal patrun da 35 milliuns francs (cump. era survart). Ils 23,7 milliuns francs restants èn d'attribuir a mesiras da paja, al dumber da persunal levamain pli aut en la media dals onns – tranter auter per la cybersecurity e la protecziun da datas – sco er a custs da restructuraziun. Ils custs da program e da producziun ch'èn per 24,4 milliuns francs pli bass èn d'attribuir primarmain al fatg ch'ins ha annullà ina remessa per la diffusiun dad UKW.   

Investiziuns, amortisaziuns e projects immobigliars 

Las investiziuns materialas ed immaterialas muntan a 99,4 milliuns francs ed èn uschia 3 milliuns pli autas che l'onn passà. Las amortisaziuns sa movan cun 73,5 milliuns francs per 4,3 milliuns francs sur il nivel da l'onn passà. Ils suandants projects progredeschan sco planisà: il nov lieu da RTS sin il campus da l'EPFL a Lausanne-Ecublens sco remplazzament per las veglias surfatschas dal manaschi e dals biros a Lausanne e l'abandun da Lugano-Besso en favur d'ina concentraziun a Comano. 

Prospectiva 

L'onn 2025 sa sbassa la cumpensaziun da chareschia per 35 milliuns francs. Ensemen cun il regress spetgà dals retgavs commerzials signifitga quai che la SRG SSR sto realisar gronds respargns per cuntanscher in resultat equilibrà. Ils proxims onns vegnan anc pli pretensius: il martgà da reclama che cuntinuescha ad erodar, la reducziun da la taxa da medias a partir dal 2027 decisa dal Cussegl federal per ordinaziun ed il nivel dals custs che crescha il medem mument sforzan la SRG SSR mintg'onn da sa sfadiar per spargnar. Il 2029, l'onn che vegn fatg il segund pass areguard la reducziun da la taxa da medias, ha quai per consequenza in sbassament dal budget da 270 milliuns francs, damai da 17 pertschient, en confrunt cun l'onn 2024. Sin fundament da questa situaziun finanziala e sin fundament da las modas da consum e da las relaziuns dal martgà che sa midan sto la SRG SSR sa transfurmar. Sut il num «Enavant SRG SSR» ha ella perquai lantschà l'atun 2024 in process da transfurmaziun cumplessiv. 

Quint da gudogn e perdita 2024  

 

Il rapport annual da la SRG SSR vegn publitgà la fin d'avrigl suenter che la radunanza da delegadas e delegads al ha approvà.