Solidaritad
Mitigiar la povradad e promover la participaziun sociala: nus ans demussain solidarics er en dumondas umanitaras.
Chadaina da Fortuna
Il 1946 avain nus fundà la Chadaina da Fortuna sco instrument umanitar da la SRG SSR per gidar umans en miseria. 26 ovras d'agid partenarias svizras realiseschan las acziuns operativas da la Chadaina da Fortuna. Ils daners da la Chadaina da Fortuna èn suttamess a trais controllas da finanzas e tutgan tar il chapital controllà il meglier en Svizra.
2x Nadal
2x Nadal è in'acziun da collecta caritativa en collavuraziun cun la Crusch Cotschna Svizra, la Posta e Coop. L'acziun appellescha a las Svizras ed als Svizzers da far cun in pachet in plaschair a persunas dischavantagiadas en Svizra ed a l'exteriur.
Fundaziun Denk an mich
La fundaziun da solidaritad da Schweizer Radio und Fernsehen (SRF) s'engascha dapi passa 55 onns per la participaziun cun ils medems dretgs a la vita sociala. Tranter auter pussibilitescha ella vacanzas ed activitads dal temp liber ad umans cun impediments che na pon betg sa prestar quellas. Grazia a passa 10'000 donatur:as dat la fundaziun access a vacanzas ed ad activitads dal temp liber a bundant 25'000 persunas pertutgadas ad onn. Dapi la fundaziun han ins rimnà dapli che 110 milliuns francs per quest intent.
Mitenand
L'emissiun «mitenand» da SRF raquinta mintg'emna cun agid da curtas reportaschas da problems da sanadad, da la povradad sociala e da l'ambient en Svizra ed en pajais en svilup. Ils rapports mussan a maun d'umans pertutgads co che organisaziuns d'agid privatas reageschan sin questas sfidas.
Dapi l'entschatta 2005 stat «mitenand» sut il patrunadi da la SRG SSR e vegn emess era sin RTS («ensemble») e RSI («insieme»).
Actualisà l'ultima giada: zercladur 2024