Barat e plurilinguitad tar la SRG SSR e Movetia

Dals 18 fin ils 22 da november ha lieu la segunda ediziun da l'emna da barat naziunala. Organisada vegn ella da Movetia, l'agentura naziunala per barat e mobilitad, en collavuraziun cun ils chantuns e cun sustegn da la SRG SSR sco partenaria da medias. Ils emetturs da radio e televisiun da la SRG SSR accumpognan l'emna cun contribuziuns.  

Passa 3500 scolar:as da l'entira Svizra vegnan a surpassar ils cunfins linguistics da noss pajais. Saja quai cun in'excursiun, ina cuntravisita, lavuratoris u in'activitad virtuala: a las classas participantas vegnan purschidas differentas pussaivladads da s'inscuntrar e da duvrar linguas estras. Ina survista da tut las activitads datti qua. 

Il punct culminant da l'emna da barat naziunala è la conferenza da medias dals 19 da november cun il cusseglier federal Guy Parmelin, la cussegliera guvernativa Christine Häsler, represchentant:as dals chantuns e giuvenils da tut las regiuns linguisticas da la Svizra. A la conferenza da pressa vegnan scolar:as a preschentar lur experientschas fatgas cun il Culturetrail elavurà dapi pliras emnas. Il Culturetrail è ina chatscha da stgazis culturala ed interactiva ch'ina classa da scola bernaisa ha organisà e che vegn absolvida ils 18 da november cun trais classas partenarias. Il post «far radio» vegn tgirà dad «ils auters, les autres, gli altri, die anderen», la gruppa da radio interregiunala da la SRG SSR.  

Susanne Wille, directura generala da la SRG SSR: «La Svizra è in pajais unic gist era pervia da nossa diversitad linguistica. Lingua è dapli ch’ina collecziun da pleds u da grammatica. Lingua signifitga cultura, identitad, istorgia. E gist per quels motivs èsi impurtant da promover la chapientscha vicendaivla sur ils cunfins linguistics or ed il medem mument era la coesiun a l’intern da la Svizra. La diversitad ha rinforzà la Svizra ed igl è nossa incumbensa d’avair quità dad ella. Per quai s’engascha la SRG SSR, sco suletta chasa da medias che publitgescha cuntegn en tut las quatter linguas naziunalas, cun ses programs e quai di per di. Da promover la plurilinguitad è era la finamira da l’emna da barat naziunala. Per quel motiv la sustegnain nus gugent.» 

Barat da moderaziun tar SRF, RTS, RSI e RTR  

Cun sia purschida collia la SRG SSR di per di las regiuns linguisticas. A chaschun da l'emna da barat naziunala fa ella quai cun in project spezial: moderatur:as da SRF, RTS, RSI e RTR barattan lur plaz da lavur per in'emissiun e modereschan il format dad in'autra regiun linguistica – tant a la televisiun sco er en il radio. SRF e RTS van schizunt anc in pass pli lunsch: RTS producescha l'emissiun «Le 19h30» per tudestg per il public da la Svizra tudestga e SRF la «Tagesschau» per franzos per il public da la Svizra franzosa. Las emissiuns vegnan moderadas da las persunas usitadas, dentant en la lingua da l'autra regiun. Tut las mesiras en il rom dal barat da moderaziun chatt'ins en la suandanta survista.

Il barat da moderaziun sin ils emetturs da la SRG SSR metta en il center la plurilinguitad da la Svizra, renda visibla la diversitad culturala e linguistica dal pajais e promova la coesiun. Er da quai: «Co in’emna da barat rinforza l’attaschadadad naziunala» 

Film documentar «Chantez-vous Suisse» sin Play Suisse 

Play Suisse lantscha a chaschun da l’emna da barat in film documentar davart il project da musica interregiunal «Chantez-vous Suisse?» al foss dal rösti a Friburg. Il film purtretescha tschintg musicist:as da tut las regiuns linguisticas e cun biografia da migraziun en il process co ch'els preparan ensemen in concert pluriling. Il film documentar è da vesair era sin ils emetturs da la SRG SSR. 

Plurilinguitad tar la SRG SSR 

Veglias tradiziuns, dialects sonors, differents stils da viver – las particularitads culturalas e linguisticas rendan unica la Svizra. La SRG SSR s'orientescha als basegns multifars da la populaziun svizra e renda visibla questa gronda diversitad en la vasta purschida da SRF, RSI, RTR e RTS. Saja quai en l'infurmaziun, la cultura, la furmaziun, il sport u il divertiment. Ed era sin Play Suisse gioga la plurilinguitad ina gronda rolla: cun sia vasta purschida da serias svizras sco «Tschugger» u «L’ultim rumantsch» – ch'èn disponiblas per tudestg, franzos e talian, per part schizunt per rumantsch – cuntanscha la plattafurma da streaming da la SRG SSR tut las regiuns linguisticas.