Cooperaziuns
Cun las cooperaziuns ha la SSR primarmain duas finamiras: ella vul promover la derasaziun da ses cuntegns e rinforzar la plazza da medias svizra. Plinavant fa la concessiun da la SSR tschertas prescripziuns concernent la cooperaziun e la collavuraziun cun terzs (concessiun: art. 9 Divertiment, art. 10 Sport, art. 25–31 Producziun e collavuraziun).
Las prestaziuns da cooperaziun da la SSR cumpiglian en emprima lingia l'access a cuntegns, prestaziuns da sustegn directas u contribuziuns finanzialas. Ins distingua tranter cooperaziuns cun:
Radios privats svizzers
Partenaris da cooperaziun: Associaziun svizra dals radios privats (ASRP), Radio Régionales Romandes (RRR), Uniun dals radios locals senza finamira da rendita (UNIKOM), Radio James FM, Radio 3i, Vintage Radio, Radio Inside, Radio Freundes-Dienst, Radio Life Channel, Radio Südostschweiz, RedLine Radio, Radio2go.fm, Radio Fribourg-FR, Sunradio, Radio Summernicht, 7Radio, JamOnRadio, Radio Fiume Ticino, Radio 4TNG, Vostok, Radio MultiKulti, Radio Rottu, SkullFM, Agaune Radio, Radio Réveil e Radio L.
Surpigliar las novitads da radio
Ils radios privats pon emetter fin 24 bulletins da novitads da la SSR a moda integrala e simultana cun inditgar la funtauna.
The Swiss Music Portal Mx3
SRF gestiunescha la plattafurma da musica mx3.ch, sur la quala bands svizras pon render accessibla lur musica al public, ad emetturs ed ad organisaturas ed organisaturs da concerts e d'events. La SSR porscha a radios privats il cundiever da la banca da datas da mx3.ch.
DAB+
Per la diffusiun digitala (Digital Audio Broadcasting DAB+) metta la SSR a disposiziun spazi da diffusiun sin ils agens layers DAB+ cun reducir il volumen dals agens programs da radio ed uschia sminuir levamain la qualitad auditiva.
DigiMig
La SSR e privats èn sa cunvegnids en la gruppa da lavur DigiMig (migraziun digitala) sin ina soluziun da branscha per remplazzar las undas ultracurtas (UUC/UKW) ed uschia realisar la migraziun da cuminanza.
Swiss Radioplayer
La SSR ha fundà ensemen cun trais associaziuns da radio privatas la societad da manaschi «Swiss Radioplayer GmbH». La societad da manaschi è l'editura da l'app per tadlar radios «Swiss Radioplayer». Ins spetga ina meglra derasaziun cun salvar la cumpetenza dals cuntegns.
SwissRadioDay
Dapi 1999 organiseschan la SSR e duas associaziuns da radio cuminaivlamain il SwissRadioDay. I sa tracta d'in inscunter da branscha da l'industria da radio svizra ed è la suletta occurrenza per represchentantas e represchentants da tut las regiuns linguisticas da la Svizra. Era l'UNIKOM e la rait da DAB+ Digris èn integradas.
Televisiuns privatas svizras
Partenaris da cooperaziun: Alphavision AG/ERF Medien, Presse TV, TV Léman Bleu, Canal 9, La Télé, CH Media.
Acquistar films e serias
Films dramatics e serias vegnan savens acquistads sco cumpra da licenzas. Il pretsch per questas licenzas s'orientescha a pajais da medema lingua pli gronds, perquai ch'i fiss memia char da far sincronisaziuns mo per il pitschen martgà svizzer. La SSR acquista suletta, però er ensemen cun realisaturs svizzers da televisiuns privatas.
Fanestra da program
Tenor l'art. 29 da la concessiun sa stenta la SSR da collavurar cun realisaturs svizzers sin ses chanals linears, sche la diversitad da purschida daventa uschia pli gronda ed i na resultan per la SSR nagins custs supplementars. Exempels per questa furma da la collavuraziun èn las emissiuns «Fenster zum Sonntag», «NZZ Format» ubain «Standpunkte».
Events da sport ed events da sport en directa
La SSR producescha exclusivamain differentas occurrenzas da sport en Svizra che era realisaturs da televisiuns privatas pon emetter grazia a las cooperaziuns (sublicenzas). Per exempel: gieus da las disciplinas indoor ballabasket, ballamaun, unihockey e ballarait u festas da lutga. Sa basond sin ina collavuraziun vegnan emess en directa a partir dal 2022 era gieus da la squadra naziunala da ballape sin ils emetturs da CH Media.
HbbTV
La televisiun interactiva (HbbTV) è la successura digitala dal teletext analog. La SSR ha sviluppà ina plattafurma tecnologica per HbbTV ch'ella metta a disposiziun als realisaturs da televisiuns privatas. Per persunas cun impediments dals senns ha la SSR sviluppà ina tecnologia per suttitels en directa via HbbTV. La SSR vegn ad offrir la tecnologia ad emetturs privats che ston tenor lescha suttitular tschertas emissiuns en il futur.
SAT Access
La SSR porscha a realisaturs da televisiuns privatas la pussaivladad d'affittar l'infrastructura da distribuziun cunter indemnisaziun.
Editurs svizzers
Partenaris da cooperaziun: Keystone-ATS, NZZ, TX Group, Ringier, Ringier Axel Springer (RASCH), Fundaziun Medias Rumantschas (FMR).
Plattafurma da shared content
Tenor l'art. 31 da la concessiun metta la SSR a disposiziun versiuns curtas da cuntegns audiovisuals da l'actualitad dal di ad autras interpresas svizras da medias che renconuschan la decleraziun dals dretgs e da las obligaziuns da las schurnalistas e dals schurnalists dal Cussegl svizzer da la pressa. Actualmain èn sa registradas var 70 interpresas svizras da medias sin il portal da shared content da la SSR (https://sharedcontent.srgssr.ch/#/).
Access a l'archiv
Gia avant ch'i deva la plattafurma da shared content è la SSR sa decidida da metter a disposiziun gratuitamain cuntegns (cun inditgar la funtauna) dals archivs als realisaturs svizzers da televisiuns privatas.
Barat da cuntegns da text
La SSR metta a disposiziun contribuziuns da texts elavuradas en atgna responsabladad per publitgar en gasettas e sin paginas-web.
Keystone-ATS
La participaziun da la SSR a la suletta agentura da novitads da la Svizra è impurtanta per la plazza da medias svizra.
SwissMediaForum
Il SwissMediaForum che ha lieu mintg'onn è l'inscunter suprem da la branscha svizra da medias e communicaziun. La direcziun han las chasas da medias CH Media, NZZ, Ringier, TX Group e la SSR.
SMD
La SMD (Schweizer Mediendatenbank) è vegnida fundada da Ringier, da Tamedia e da la SSR per sustegnair cun servetschs digitals da documentaziun e d'archiv centrals la qualitad publicistica dals societaris. Entant cuntegna la banca da datas il text integral da la plipart da las gasettas svizras quotidianas ed emnilas sco er artitgels tschernids da titels da pressa internaziunals. La SSR è participada a la SMD. www.smd.ch
Realisaturs da l'exteriur
La SSR represchenta la Svizra a l'exteriur cun las suandantas cooperaziuns.
3sat
Diffusiun d'in program da satellit tudestg da ZDF, ARD, ORF e da la SSR. La SSR porscha programs da cultura e prestaziuns redacziunalas che muntan a var 10 pertschient dal program cumplet. www.3sat.de
TV5 Monde
TV5 Monde cuntanscha cun la diffusiun da novitads e cun emissiuns d'infurmaziun en lingua franzosa – cun nov versiuns adattadas a la zona d'urari respectiva – mintga mais var 300 milliuns chasadas en tut il mund. TV5 Monde vegn purtà dals emetturs da radiodiffusiun da dretg public da la Frantscha, da la Belgia, dal Canada, dal Quebec, da Monaco e da la Svizra. www.tv5monde.com
Arte
Chanal da televisiun cultural europeic. La SSR sa participescha a coproducziuns. www.arte.tv
Organisaziun da las Svizras e dals Svizzers a l'ester OSE
L'OSE è ina fundaziun svizra. Ella infurmescha las cumpatriotas ed ils cumpatriots a l'exteriur davart quai che curra e passa en la patria tenor lur basegns specifics e porscha ad ellas ed els ina vasta paletta da servetschs. Ins ha cunvegnì da barattar regularmain cuntegns da la plattafurma online www.swissinfo.ch e da l'organ da publicaziun da l'OSE, la «Schweizer Revue».
Industria svizra audiovisuala
La SRG SSR collavura stretgamain cun ils pli differents partenaris da producziun da l'industria audiovisuala svizra. Quella cumpiglia producentas e producents da film, acturas ed acturs da la producziun d'incumbensa sco era purschiders da servetschs tecnics d'audio e da camera (camera, tun, glisch e grip, tagl, postproducziun da maletg e tun, locaziun d'indrizs, euv.). La collavuraziun da la SRG SSR cun l'industria audiovisuala svizra è reglada en ina cunvegna che la SRG SSR ha fatg cun las associaziuns respectivas. En quella cunvegna conferma la SRG SSR sia intenziun da s'engaschar per ina producziun audiovisuala d'auta qualitad en Svizra. En pli promova la cunvegna producziuns naziunalas e purschiders da servetschs svizzers. La glista suandanta enumerescha ils partenaris che han dà il consentiment per la publicaziun. Ella n'è betg cumpletta.
Ulteriuras cooperaziuns ed auters partenadis
Chadaina da Fortuna
La Chadaina da Fortuna collectescha daners en cas da catastrofas – chaschunadas da l'uman u da la natira – e sa participescha a la finanziaziun da programs d'agid da las partenarias da la Chadaina da Fortuna, las ovras d'agid svizras. La SSR è commembra fundatura e commembra da la fundaziun da la Chadaina da Fortuna. www.glueckskette.ch
MAZ
Il MAZ (Center da scolaziun da medias) è la pli impurtanta scola da schurnalistas e schurnalists da la Svizra tudestga. La SSR sustegna il MAZ annualmain cun 250 000 francs. Ultra da quai partan collavuraturas e collavuraturs da la SSR lur savida e lur abilitads: la partiziun da furmaziun da SRF organisescha curs ensemen cun il MAZ. www.maz.ch
Memoriav e la Fonoteca naziunala svizra
La SSR è commembra fundatura e commembra da l'associaziun da Memoriav. Memoriav è l'associaziun per la conservaziun dals bains culturals audiovisuals da la Svizra. www.memoriav.ch. En pli è la SSR commembra fundatura e commembra da la fundaziun da la Fonoteca naziunala svizra. La Fonoteca naziunala svizra ha l'incumbensa da collectar, da render accessibels e da metter a disposiziun per il diever portatuns cun in cuntegn che reguarda l'istorgia e la cultura svizra. www.fonoteca.ch
Viasuisse
La Viasuisse SA registrescha, examinescha ed elavura da di e da notg las infurmaziuns da traffic per las vias ed ils binaris da l'entira Svizra e las surdat cuntinuadamain en trais linguas a las medias da la SSR ed a radios privats svizzers. www.viasuisse.ch
Producziuns audiovisualas
La SSR è dapi onns partenaria da l'industria svizra audiovisuala. Ina cunvegna reglescha la collavuraziun tant cun las interpresas da servetschs tecnics sco era cun las producentas ed ils producents d'incumbensa areguard la producziun excorporada d'emissiuns e da programs. La SSR s'engascha uschia per ina producziun audiovisuala qualitativamain auta en Svizra.
Charta da la musica svizra
La cunvegna da collavuraziun cun la branscha da musica svizra oblighescha la SSR d'emetter en ses programs da radio ina quantitad adequata da producziuns da musica svizra. Las valurs directivas areguard la preschientscha da musica svizra fixadas annualmain da la branscha da musica svizra vegnan per il solit surpassadas levamain.
Pacte de l'audiovisuel
Il Pacte de l'audiovisuel definescha las cundiziuns da basa per producziuns che la SSR realisescha ensemen cun producentas e producents da film independents. La SSR investescha passa 30 milliuns francs ad onn en la branscha da film svizra.
Initiative for Media Innovation (IMI)
La Scola politecnica federala Losanna (SPFL), la SSR, Ringier ed il «Triangle Azur» (in'uniun da las universitads da Genevra, Losanna e Neuchâtel) promovan cuminaivlamain innovaziuns en il sectur da las medias e da la tecnologia d'infurmaziun. Era l'Uffizi federal da communicaziun (UFCOM) sustegna projects da questa iniziativa. L'IMI è averta per tut las acturas e tut ils acturs privats e publics naziunals ed internaziunals che s'engaschan en quest sectur e che vulan s'associar cun ella.
Professura a la Scola politecnica federala (SPF/ETH)
La SSR è la partenaria promotura per stabilir ina professura ed in nov center per tecnologia da medias a la SPF Turitg. Cun las chasas da medias NZZ, Ringier e TX Group contribuescha la SSR uschia ad avischinar la pratica e la perscrutaziun en il sectur da la tecnologia da medias ed a render utilisabel il progress tecnologic per la plazza da medias svizra.
Partenadis da medias
La SSR promova cun ses partenadis da medias la producziun e la vita culturala en Svizra. La SSR sustegna surtut occurrenzas d'impurtanza naziunala. En las regiuns cumpletteschan ils emetturs da la SSR quest engaschi cun ulteriurs partenadis individuals.
- Allianz Di dal kino
- Geneva International Film Festival (GIFF)
- Fachtagung «E-Accessibility»
- Castellinaria Festival del cinema giovane
- 2x Nadal
- Die Zauberlaterne
- Zurich Film Festival
- Dis dal film curt da Winterthur
- Dis dal film da giuvenils
- Dis da film da Soloturn
- Dis da litteratura da Soloturn
- Fantoche
- Festival International de Films de Fribourg (FIFF)
- Festival International du Film Alpin des Diablerets (FIFAD)
- SBB Schul- und Erlebniszug
- Kids Film Forum
- Baloise Session
- International Film Festival and Forum on Human Rights (FIFDH)
- Lettere dalla Svizzera alla Valposchiavo
- Locarno Film Festival
- Movetia
- Museum Svizzer da Transports
- Neuchâtel International Fantastic Film Festival (NIFFF)
- Premi dal film svizzer
- Swiss Press Award
- Visions du Réel
- Enter Technikwelt Solothurn
Actualisà l'ultima giada: schaner 2025
![[Translate to Rätoromanisch:] Paket, Post, Päckli, 2 x Weihnachten](/fileadmin/_processed_/5/7/csm_2024-12-04_2xWeihnachten_SRK_612367d703.jpg)
