La SRG SSR lantscha ina transfurmaziun d’interpresa cumplessiva

Susanne Wille è sa drizzada venderdi, il 1. da november 2024, a las collavuraturas ed als collavuraturs da la SRG SSR en il rom d’ina conferenza da video. Ella ha beneventà il persunal, communitgà sias prioritads e lura discutà cun collavuraturas e collavuraturs da las differentas regiuns ed unitads.  
 
Prioritad per la directura generala ha ina transfurmaziun d’interpresa cumplessiva che vegn manada sut il num «Enavant SRG SSR». Il process da svilup quai che reguarda la strategia ed il svilup d’organisaziun sa basa sin differents facturs. Igl è in’obligaziun d’interpresa che la SRG SSR s’orientescha conscienziusamain e prospectivamain tenor in rom finanzial ch’è sa midà. Facturs da planisaziun èn la reducziun da la taxa da medias pass per pass tenor las adattaziuns dal Cussegl federal, las entradas da reclama regressivas e pretschs che creschan ad in crescher. La SRG SSR quinta ch’ella stoppia spargnar fin l’onn 2029 var 270 milliuns francs, quai che correspunda ad ina reducziun dal budget da var 17 pertschient. Vitiers vegn la midada d’utilisaziun da las medias e la concurrenza internaziunala che pretendan in process d’adattaziun da l’interpresa.  
 
«Enavant SRG SSR» è fin ussa la pli gronda transfurmaziun en l’istorgia da l’interpresa. Nov è il process areguard il proceder, la profunditad, la cumplexitad e la sveltezza. Las reducziuns dal preventiv na vegnan betg repartidas exclusivamain sin las differentas unitads d’interpresa, mabain l’interpresa vegn considerada sco unitad. Las dumondas centralas èn: cun tge strategia da purschida sa drizza la SRG SSR a las pretensiuns dal service public medial da l’avegnir e co po ella porscher vinavant ina plivalur al public. Tge structuras e tge process dovra la SRG SSR en il futur, co funcziuna la collavuraziun tranter las unitads d’interpresa, co nizzegia ella la tecnologia, e co reussescha questa transfurmaziun entaifer quest rom da temp. Susanne Wille ha punctuà che la SRG SSR stoppia agir svelt. Perquai haja ella sco directura generala instradà – dapi sia tscherna e suenter in’analisa fundada – en cunvegnientscha cun il cussegl d’administraziun ed il comité directiv il cumenzament dal process da strategia. Plinavant ha Susanne Wille menziunà che la SRG SSR vegnia ad infurmar a moda transparenta, uschespert ch’ils parameters da basa sajan pli clers – l’emprim ils collavuraturs e las collavuraturas e lura la publicitad.

Ina SRG SSR en il servetsch da la societad  

Ultra da quai priorisescha la nova directura generala il program ed il dialog cun il public e cun la politica. Susanne Wille vul s’engaschar en il process politic ch’ha cumenzà cun l’iniziativa «200 francs bastan» e mussar la plivalur da la SRG SSR per la societad. «Jau stun per ina SRG SSR che sa sviluppescha vinavant, ch’è agila ma il medem mument era fidabla», di Susanne Wille. Ella s’engascha per ina SRG SSR che porscha qualitad e per ina chasa da medias ch’appartegna a tuttas e tuts.