Material da basa per las medias privatas svizras
Dapi l'entschatta dal 2025 metta la SRG SSR a disposiziun material da basa audiovisual a las medias privatas svizras. La finamira è da promover uschia la plazza da medias svizra e da rinforzar la collavuraziun tranter la SRG SSR e las interpresas da medias privatas.
Cun adattar l'artitgel 31 da la concessiun da la SRG SSR per il 1. da schaner 2025 s'oblighescha la SRG SSR da metter a disposiziun a las interpresas da medias privatas en Svizra a partir dal 2025 cuntegns davart actualitads dal di senza prestaziuns redacziunalas da vart da la SRG SSR. Quest material da basa pon las chasas da medias elavurar libramain. La nova purschida pussiblitescha a las interpresas da medias privatas da duvrar il material a moda flexibla per lur rapports online.
Il material da basa vegn mess a disposiziun sur ina nova plattafurma dad API. Quella remplazza la plattafurma da Shared Content da fin qua da la SRG SSR. Per avair access a la plattafurma dad API èsi necessari da sa registrar.
I vala la decleraziun dal Cussegl svizzer da la pressa
Las interpresas da medias privatas èn obligadas sco fin qua da renconuscher e da mantegnair l'integritad e las valurs formuladas en la Decleraziun dal Cussegl svizzer da la pressa davart las obligaziuns ed ils dretgs da las schurnalistas e dals schurnalists. Sco gia en il passà furma questa decleraziun er en l'avegnir la basa per ina collavuraziun confidenta e fritgaivla tranter la SRG SSR e las interpresas da medias privatas en Svizra.