Access senza barrieras

L'access senza barrieras als programs da la SRG SSR cumpiglia tut las commembras e tut ils commembers da la societad. Nus amplifitgain cuntinuadamain la gronda purschida da cuntegns cun suttitels, audiodescripziuns e lingua da segns – a moda tematica e tecnica.

Persunas cun in impediment da la vesida u da l'udida dovran suttitels, emissiuns en lingua da segns ed audiodescripziuns per suandar il program. La SRG SSR porscha a Svizras e Svizzers cun senns restrenschids in vast program durant la primetime e la fin d'emna. Tranter auter las novitads principalas da la «Tagesschau» sin SRF, RTS e RSI en lingua da segns e las emissiuns «Kassensturz» (SRF) ed «A bon entendeur» (RTS). Bundant 84 pertschient dals programs da televisiun han suttitels. Er ina gronda part dals programs accessibels en l'internet è suttitulada.  Per questa prestaziun procura nossa societad affiliada SWISS TXT.

Bild: @SRF

Nova cunvegna 2023-2027

Nus avain suttascrit ina cunvegna areguard las prestaziuns en favur da persunas cun impediments dals senns. Quella reglescha tge emissiuns che vegnan suttituladas e tge cuntegns transcrits u cumplettads cun la lingua da segns.

La cunvegna 2023–2027 cumpiglia las suandantas novaziuns:

  • Oz suttitulescha la SRG SSR 84 pertschient da sia purschida da televisiun lineara. Da nov vul ella suttitular fin il 2027 tut las emissiuns da televisiun redacziunalas.
  • En la purschida online augmenta ella medemamain la cumpart da las emissiuns cun suttitels. Quant grond che quel augment è dependa fermamain dal svilup da sistems automatisads cun ina qualitad suffizienta.
  • La purschida da la SRG SSR cumpiglia gia oz 1200 uras emprimas diffusiuns en lingua da segns. Fin il 2027 èsi planisà da vegnir sin 1300 uras. Per las novas emissiuns èn prioritars cuntegns politics e cuntegns per uffants e giuvenils.
  • La SRG SSR prevesa d'amplifitgar sia offerta er en il champ da las emissiuns cun audiodescripziun: quellas duain vegnir extendidas substanzialmain dad oz passa 1200 uras sin 2000 uras l'onn 2027. La SRG SSR s'oblighescha da cumprar e d'emetter cuntegns cun audiodescripziun, tant enavant che quai fa senn dal punct da vista economic, logistic e qualitativ.
  • L'access senza barrieras a paginas-web ed apps meglierescha la SRG SSR cuntinuadamain, plattafurmas novas sviluppescha ella dal tuttafatg senza barrieras.
  • Meglierar la collavuraziun: ensemen cun las associaziuns creescha la SRG SSR novas gruppas da lavur per discutar aspects qualitativs, novaziuns e pussaivladads tecnicas ed integrar directamain persunas pertutgadas.

Nossas associaziuns partenarias

 

Actualisà l'ultima giada: zercladur 2024