Sistem per garantir la qualitad

Relevanza munta, da preferir en la rapportaziun tar la schelta dal tema e da la perspectiva l’interess general a l'interess d’ina gruppa specifica. Plinavant sa basa ina rapportaziun relevanta sin l’actualitad dal tema e sin sia significaziun politica, economica, culturala e sociala. Era la proximitad spaziala e culturala al mintgadi dal public sa crear relevanza.

La lavur da medias professiunala sa basa sin contribuziuns objectivas e normas eticas. Cun auters pleds: tut ils fatgs e las posiziuns ch’èn avant maun ston vegnir tratgs en consideraziun e vegnan preschentads a moda correcta ed equilibrada. Quai cun la finamira ch’il public sa furmar sia atgna opiniun davart il tema. Collavuraturas e collavuraturs da medias enconuschan ils cunfins legals e las directivas publicisticas e respectan normas da l'etica da medias era cura ch'i fa prescha. La clav per professiunalitad schurnalistica è la scolaziun e furmaziun.

Independenza munta che las collavuraturas ed ils collavuraturs da medias tschernan ils temas senza resguardar interess statals, socials, politics ubain economics. Ellas ed els rapportan senza reguardar agens interess e s'abstegnan en cas d'in conflict d’interess. Retschertgas fan ellas ed els ord atgna iniziativa.

La SRG SSR tgira il dialog cun las diversas gruppas da la societad svizra dal 21avel tschientaner – per exempel cun tuttas schlattainas, tuttas gruppas da vegliadetgna, tuttas furmaziuns e tuttas gruppas etnicas. L’offerta consista da numerus differents geners e formats, e represchenta il vast spectrum d’opiniuns.

La SRG SSR segirescha l’access a sia offerta via ils puncts da contacts relevants per las utilisadras ed ils utilisaders. Tut la populaziun e tut ils commembers da la societad duessan avair access senza barrieras. L’offerta cuntegna tuttas quatter linguas uffizialas svizras. Ils programs ed ils products vegnan preschentads a moda chapibla e survesaivla ed ils archivs da la SRG SSR stattan a disposiziun al public.

• Il context ed ils princips fundamentals da tut la lavur da la SRG SSR e sia purschida èn fixads en la Lescha federala davart radio e televisiun (LRTV), en la concessiun da la SRG SSR, en la strategia da l’interpresa e sias purschidas sco er en sia Charta da la purschida. Quests documents vegnan actualisads regularmain, publitgads en l’internet e l’intranet e surpigliads da las unitads d’interpresa.
• RSI, RTR, RTS, SRF e SWI integreschan quests documents da referenza en lur pratica e cumpletteschan els, sche necessari, cun directivas e reglas che tegnan quint da las particularitads da las singulas unitads d’interpresa. Quests documents vegnan actualisads regularmain e publitgads en l’internet e l’intranet.
• Mintga purschida structurala sto vegnir descritta obligantamain en il rom d’in concept/mandat. Quest concept/mandat determinescha il gener, il rom tematic, l’orientaziun redacziunala ed ils elements da las singulas purschidas. En quest concept/mandat vegnan er descrittas las finamiras quantitativas ed ulteriuras finamiras. Ils concepts/mandats vegnan surlavurads regularmain ed èn liants per las redacziuns.

I vegn controllà regularmain, sch’ils standards, las normas e las finamiras vegnan applitgads e respectads e sche propostas externas vegnan resguardadas.

• Las redacziuns procuran per las controllas da qualitad avant e suenter l’emissiun/publicaziun. Per far quellas controllas suondan ellas ils process che las singulas unitads d’interpresa han stabilì. Quests process da controlla vegnan actualisads regularmain.
• Las partiziuns examineschan la purschida, per la quala ellas èn responsablas, cun controllas regularas e punctualas.
• Mintga unitad d'interpresa examinescha la purschida en sia responsabladad cun controllas regularas e punctualas. Mintga unitad scriva en pli in rapport da qualitad che tematisescha ina part da la purschida.

Ils resultats da las controllas vegnan communitgads en ina furma adattada a las collavuraturas ed collavuraturs involvids ed a la publicitad:

• Redacziuns: Ils resultats da las controllas da qualitad vegnan tematisads en sedutas regularas. Redacziuns grondas scrivan protocols e communicaziuns che vegnan messas a disposiziun a las collavuraturas ed als collavuraturs pertutgads. Dumondas externas vegnan respundidas en furma adattada a scrit.
• Partiziuns: Ils resultats da las controllas da qualitad vegnan tematisads en sedutas regularas. Protocols e communicaziuns da las sedutas vegnan messas a disposiziun a las collavuraturas ed als collavuraturs pertutgads. Dumondas externas vegnan respundidas en furma adattada a scrit.
• Direcziun: Ils resultats da las controllas da qualitad vegnan tematisads en sedutas regularas. Protocols e communicaziuns da las sedutas vegnan messas a disposiziun a las collavuraturas ed als collavuraturs pertutgads. Dumondas externas vegnan respundidas en furma adattada a scrit. La controlla da qualitad da quest stgalim cumpiglia discussiuns davart la communicaziun dals resultats cun las redacziuns participadas. Davart ils resultats ils pli impurtants vegn la publicitad infurmada cun rapports da qualitad en il rapport annual da la SRG SSR.

Per consequenza da las differentas controllas da qualitad vegnan fatgas adattaziuns en las domenas pertutgadas.

• Normas e finamiras: Ils documents fundamentals (normas internas e concepts/mandats) sco era las finamiras correspundentas vegnan revedids ed adattadas tenor basegn en il rom da las mesiras da correctura decididas.
• Adattaziun da la purschida: L’adattaziun da la purschida vegn fatga tenor ils resultats da la controlla da qualitad e d’ulteriuras analisas. Las adattaziuns impurtantas a basa da las controllas da qualitad vegnan publitgadas en il rom dals rapports da qualitad entaifer il rapport da gestiun da la SRG SSR.

• La SRG SSR dat paisa a la qualitad da la scolaziun e furmaziun da sias collavuraturas e ses collavuraturs, cun elavurar normas e reglaments supportivs che valan per l’entira interpresa. Sche necessari cumpletteschan RSI, RTR, RTS, SRF e SWI quests documents cun reglaments specifitgants che resguardan ils basegns particulars da las singulas unitads d’interpresa. Ils documents vegnan controllads regularmain, sche necessari vegnan els adattads ed alura publitgads per diever intern.
• Il nov persunal vegn sensibilisà en ina furma adequata per ils standards ed il management da qualitad en il rom d’ina scolaziun da basa. Per praticant:as è previsa ina scolaziun adattada a lur champ da lavur.
• En il rom dal discurs annual tranter collavuratur:a e superiur:a direct:a vegn discurrì davart il basegn individual da scolaziun e perfecziunament u davart ulteriuras mesiras per il svilup dal persunal. Ils puncts tematisads vegnan mess en scrit. Scolaziuns en gruppa per redacziuns, partiziuns u unitads da fatschenta vegnan coordinadas ad hoc cun las domenas pertutgadas (scolaziun, tecnica, …) ed integradas en projects concrets. Las mesiras impurtantas vegnan publitgadas en il rom da rapports da qualitad entaifer ils rapports da gestiun da la SRG SSR.