Interpresa
La Societad svizra da radio e televisiun (SSR) cumpiglia tschintg unitads d'interpresa (RSI, RTR, RTS, SRF, SWI swissinfo.ch), la direcziun generala sco er la societad affiliada SWISS TXT.
Cun var 7200 collavuraturas e collavuraturs respectivamain 5700 plazzas a temp cumplain, cun in retgav da gestiun dad 1,54 milliardas francs, cun 17 programs da radio e 7 programs da televisiun sco er cun paginas d' internet cumplementaras, cun news apps e cun servetschs da teletext è la SSR la pli gronda chasa da medias electronicas da la Svizra. Ses programs da radio ed – en il temp d'emissiun principal – er lur programs da televisiun èn favuraivels al martgà en tut las quatter regiuns linguisticas da la Svizra; ed els sa fan valair cun success cunter in grond dumber d'emetturs esters cun ina concurrenza bler pli ferma.
Las unitads d'interpresa da la SSR infurmeschan, diverteschan e contribueschan a la furmaziun. Ellas derasan lur programs sur radio, televisiun, internet, HbbTV, teletext e Mobile Services per tuts e tuttas, da tut temp e dapertut per las medemas cundiziuns. Lur purschidas adempleschan pretensiuns da maioritads e minoritads e cuvran ina vasta paletta da temas. Els sa distinguan ultra da quai tras qualitad, relevanza e varietad.
La direcziun generala a Berna è responsabla per la direcziun, la coordinaziun e la communicaziun da l'entira SSR. Las unitads d'interpresa sviluppan e derasan las purschidas en las regiuns linguisticas da la Svizra, SWI swissinfo.ch publitgescha online cuntegns schurnalistics per l'exteriur.
Actualisà l'ultima giada: matg 2024
