Qualitad per tuttas e tuts
La SRG SSR s'engascha per qualitad. Grazia a sia independenza economica e politica ed auts standards, cuntanschain nus cun il radio 53 pertschient da la populaziun svizra e 52 pertschient cun la televisiun. Nossas purschidas han ina gronda credibladad (studi lakom 2022, p. 4). La qualitad è service public.
En noss programs tschentain nus in punct da cuntrast al trend global dad infurmaziuns e currellas che sa derasan spert e che n'èn savens betg verifitgadas. Tut noss schurnalists èn obligads a nossas ideas directivas e sa tegnan vi da nossa Charta da la purschida.
Tge signifitga qualitad per la SRG SSR?
La SRG SSR contempla la qualitad da trais perspectivas:
- La perspectiva da l'incumbensa sociala: Quant bain ademplescha la SRG SSR sia incumbensa da concessiun? Indicaturs per respunder a questa dumonda èn las statisticas da program internas da la SRG SSR, las constataziuns dals cussegls dal public sco era las analisas da program fatgas per incumbensa da l'Uffizi federal da communicaziun.
- La perspectiva da las finamiras internas: Quant bain ademplescha la SRG SSR ses agens princips sco directivas, prescripziuns da scolaziun euv.? Quant bain cuntanscha ella las finamiras da sia strategia d'interpresa e da las strategias parzialas? Indicaturs per ina resposta èn las statisticas ed ils reportings interns da la SRG SSR.
- La perspectiva dal public: Quant bain plascha il program al public? Indicaturs per ina resposta èn las quotas sco era retschertgas regularas.
Tge pretenda la concessiun areguard la qualitad publicistica da la SRG SSR?
L'artitgel 4 da la concessiun descriva las pretensiuns da qualitad publicisticas envers la SRG SSR:
- La producziun da program da la SRG SSR sto satisfar ad autas pretensiuns qualitativas ed eticas.
- Ils singuls secturs da program s'orienteschan a l'incumbensa da program. Quel è medemamain descrit en la concessiun.
- Ils singuls secturs da program ston sa distinguer tras relevanza, professiunalitad, independenza, diversitad ed accessibladad. Quests tschintg criteris furman la basa dal sistem da garanzia da qualitad da la SRG SSR.
- La SRG SSR garantescha la singularitad da ses programs e sa differenziescha uschia da realisaturs cun in'orientaziun commerziala.
- La SRG SSR ha en egl ina gronda acceptanza dals differents publics en mira.
- La SRG SSR fa regularmain controllas da qualitad internas.
- La SRG SSR surdat regularmain controllas da qualitad ad experts externs. Las controllas annualas han lieu en tut las unitads d'interpresa da la SRG SSR. Ellas vegnan manadas d'expertas e d'experts cun las abilitads e las experientschas professiunalas necessarias.
- La SRG SSR infurmescha la publicitad davart ils resultats da las controllas da qualitad: en ses rapport annual orientescha ella davart sias stentas per promover la qualitad redacziunala da ses programs. Sin sias plattafurmas dat ella scleriment davart ses sistem da garanzia da qualitad.
La qualitad sco process
La qualitad n'è nagin stadi, ella sto adina puspè vegnir elavurada da nov. Nus avain sviluppà instruments per mesirar, diriger e survegliar la qualitad en il program. Impuls e propostas da noss:as collavuratur:as gidan nus a sviluppar vinavant il management da qualitad a moda orientada a la pratica. Nus ans barattain stedi cun collegas da l'exteriur e da la community da perscrutaziun.
Sistem per garantir la qualitad
Organs da controlla interns ed externs
Organs da controlla
Per pudair ademplir las pretensiuns da la concessiun ha la SRG SSR sviluppà in vast sistem per garantir la qualitad. Las unitads d'interpresa da la SRG SSR – RSI, RTR, RTS, SRF e SWI – applitgeschan quests parameters e verifitgeschan ch'els vegnian accumplids correctamain. La gruppa d'expert:as responsabla per la qualitad da RSI, RTR, RTS, SRF e SWI s'inscuntra en pli en il rom da sentupadas regularas naziunalas per barattar experientschas e savida. Ultra da quai examineschan era las differentas partiziuns da las unitads d'interpresa la qualitad da las purschidas en lur champ. Las redacziuns da lur vart garanteschan cun process da controlla specifics che la qualitad vegnia ademplida avant che emetter las contribuziuns. Plinavant prendan las unitads d'interpresa er encunter ils resuns dal public – per exempel via il servetsch da clientella u en il rom da barats.
Da vart da las purtadras e dals purtaders observa il cussegl dal public da las societads regiunalas SSR.CORSI, SRG.R, SSR.SR, SRG.D e SWI cuntinuadamain las purschidas da la SRG SSR. Sco represchentant:as da la societad civila èn responsabels las commembras ed ils commembers dal cussegl dal public era per ils resuns dal public ed ageschan sco intermediatur:as tranter la publicitad e la SRG SSR. Reclamaziuns e dumondas areguard il program respectivamain la purschida da la SRG SSR po il public drizzar al post da mediaziun independent da la societad regiunala respectiva ubain a quel da SWI. L'organ respectiv examinescha la reclamaziun e surpiglia la funcziun da mediaziun.
Actur:as extern:as
Persunas che na van betg d'accord cun ils resultats dal servetsch da mediaziun u che vulan cuntanscher ina decisiun, pon recurrer tar l'Autoritad independenta da recurs davart radio e televisiun (AIRR). Sch'ina da las duas partidas – la persuna recurrenta ubain la purschidra da program – na va betg d'accord cun la decisiun da l'AIRR, po ella purtar plant tar il Tribunal federal.
Sco autoritads da surveglianza da la SRG SSR procuran il Departament federal per ambient, traffic, energia e communicaziun (DATEC) e l'Uffizi federal da communicaziun (UFCOM) che la Lescha federala davart radio e televisiun (LRTV) sco era la concessiun vegnian accumplidas.
La concessiun pretenda che la SRG SSR laschia far controllas da qualitad regularas tras persunas spezialisadas externas. Questa premissa ademplescha la SRG SSR cun audits da qualitad externs. Ils resultats da tals audits vegnan mintgamai publitgads sut srgssr.ch.
La perscrutaziun mediala examinescha la purschida schurnalistica da la SRG SSR era senza mandat legal: il Center da retschertga per la publicitad e societad (Fög) da l'Universitad da Turitg publitgescha per exempel mintg'onn il «Jahrbuch Qualität der Medien» cun indicaturs actuals davart la qualitad mediala, il diever da las medias, la concentraziun da las medias sco er il svilup dal sistem medial en Svizra.
In ulteriur organ da controlla extern è il Cussegl svizzer da la pressa. El serva al public sco instanza da recurs alternativa e surveglia ch'il codex da las schurnalistas e dals schurnalists ch'è liant per tut:tas vegnia accumplì.