Susanne Wille daventa nova directura generala da la SRG SSR

En vista a l’urari da las proximas sfidas politicas ed incumbensas da l’interpresa ha Gilles Marchand, ensemen cun il cussegl d’administraziun, decidì il schaner 2024 da remetter sia funcziun sco directur general da la SRG SSR. Quai cun la finamira, ch'ina successiun saja pronta il pli tard l'entschatta 2025. 

Il cussegl d’administraziun ha formulà in profil d'exigenzas per la funcziun ed immediatamain instradà la tschertga per la successiun dal directur general. La plazza è vegnida scritta ora publicamain. En il rom d’in vast process structurà ha la giunta da persunal dal cussegl d'administraziun examinà, cun sustegn d’expertas ed experts, minuziusamain candidaturas internas ed externas. Sin basa da quest process è il cussegl d’administraziun vegnì a la conclusiun che Susanne Wille saja la persunalitad il meglier adattada per prender a mauns las sfidas dals proxims onns da la chasa da medias. Cun la transfurmaziun digitala cuntinuanta, la votaziun dal pievel davart iniziativa «200 francs bastan!» e cun las tractativas per la nova concessiun spetgan fatschentas da gronda impurtanza per l’avegnir da l’interpresa da medias. 

Susanne Wille è ina persunalitad cun experientscha da manar, ina communicatura versada e plurilingua e po – grazia a sias funcziuns multifaras – profitar d'inavasta e cumprovada rait en ils pli differents secturs. Medemamain ha ella las qualificaziuns necessairas areguard la transfurmaziun digitala ed ina gronda cumpetenza da management e da strategia. Uschia dispona ella da las cumpetenzas necessarias per manar la SRG SSR cun success en l'avegnir. 

Actualmain è Susanne Wille manadra da la partiziun Cultura e vicedirectura da SRF. Ella cumenza sia funcziun l’emprim da november 2024.