Segunda ediziun dal project da radio da la SRG SSR «Chantez-vous Suisse?» al Röstigraben a Friburg

Dals 10 fin ils 14 da zercladur realisescha la SRG SSR ina segunda ediziun dal project da radio interregiunal «Chantez-vous Suisse?». Suenter l'emprima ediziun da success sin il Son Gottard passentan las musicistas ed ils musicists l'emna cuminaivla quest onn en la citad bilingua da Friburg. Quatter da las artistas e dals artists represchentan mintgamai ina regiun linguistica da la Svizra, ina tschintgavla persuna represchenta ils umans en Svizra cun biografia da migraziun. Ensemen cumponan els ina nova chanzun en quatter resp. tschintg linguas che represchenta e tematisescha la plurilinguitad da la Svizra. Ultra da quai portan las musicistas ed ils musicists cun els ina chanzun tipica da lur regiun linguistica e l'interpreteschan en il decurs da l'emna cuminaivlamain da nov ed en pliras linguas. Uschia pussibilitescha il project in'invista culturala e musicala en las regiuns linguisticas respectivas ed intermediescha lur tratgs cuminaivels resp. lur differenzas. L'emna da project vegn concludida ils 14 da zercladur a las 16.00 cun in concert en «L'Atelier» a Friburg, per il qual ins po s'inscriver cun il suandant formular d'annunzia.  

La Svizra tudestga vegn represchentada da la chantadura da jazz e cumponista Chiara Jacomet, la Svizra tudestga dal musicist da pop turitgais Dom Sweden che chanta en dialect. Il chantadur e battarist tessinais Andrea Bignasca represchenta la Svizra taliana e la chantadura e cumponista Alizé Oswald da Nyon la Svizra franzosa. La part da las persunas en Svizra cun biografia da migraziun vegn represchentada da la chantadura ed artista Claudia Masika ch'è oriunda da la Kenia e viva dapi 15 onns en Svizra.  

Temps d'emissiun

Ils emprims quatter chanals da radio da la SRG SSR (Radio SRF1, RTS La Première, Rete Uno e Radio Rumantsch) rapportan en directa da «L'Atelier» a Friburg. Las audituras ed ils auditurs han uschia la chaschun da persequitar la lavur en il «champ da musica», d'emprender d'enconuscher las musicistas ed ils musicists e d'udir istorgias en connex cun il foss dal rösti plain simbolica e davart la citad bilingua da Friburg. Il punct culminant dal project è il concert che ha lieu ils 14 da zercladur a las 16.00 en «L'Atelier» a Friburg e che vegn medemamain tematisà en las emissiuns spezialas. Quellas vegnan transmessas dals 10 fin ils 14 da zercladur durant ils suandants temps: 

• RTR: mintga di da las 11.00 fin las 12.00 
• Radio SRF 1: 10/11/12/14 da zercladur da las 10.00 fin las 11.00
• RTS La Première: mintga di da las 20.00 fin las 21.00 
• Rete Uno: mintga di da las 13.00 fin las 14.00 

Ultra da quai emettan «Regionaljournal Bern, Freiburg, Wallis» da Radio SRF, l'emissiun «Die Woche in den Schweizer Sprachregionen» da SRF 4 News e las emissiuns da novitads da RTS, las emissiuns da televisiun «Schweiz Aktuell» da SRF, «Telesguard» da RTR e «Il Quotidiano» da RSI contribuziuns davart il project da radio. 

Collecziun speziala «On chante Suisse» sin Play Suisse

Punctualmain per la segunda ediziun dal project da radio è disponibla sin Play Suisse a partir dals 10 da zercladur la collecziun «On chante Suisse». Quella permetta da scuvrir 13 showcases da talents da musica svizzers da las quatter regiuns linguisticas. Tranter auter dad Andrea Bignasca che represchenta quest onn la Svizra italofona durant l'emna speziala «Chantez-Vous Suisse?» e da La Nefera che ha represchentà a chaschun da l'ultima ediziun sin il Pass dal Son Gottard ils umans en Svizra cun biografia da migraziun.