La SRG SSR metta la musica svizra en il center

Sco auters secturs culturals ha era la musica svizra ina plazza impurtanta en l'incumbensa da la SRG SSR – a chaschun dal Di da la musica svizra ils 13 da settember emettan sias staziuns da radio durant 24 uras schizunt exclusivamain musica helvetica. Da Carlo Brunner sur Stress fin a ladunna, da rap, classica fin rock: il program è uschè varià sco la musica svizra sezza e vegn cumplettà cun accents tematics, represchentaziuns live, intervistas e transmissiuns da concerts. Ed er en la televisiun e sin ils chanals digitals dat la SRG SSR ina tribuna a las musicistas ed als musicists da la Svizra.  

Ils puncts culminants dal Di da la musica svizra  

Radio RTR metta il focus surtut sin musica rumantscha e grischuna cun showcases da la band da rock Petta Pagada, dal duo ladunna e dal musicist Leander Albin.  

 

En il studio da SRF 3 èn en visita ils talents musicals Matilde, Mattiu e Mik Ivy, entant che SRF 1 metta il focus sin istorgias persunalas en e davart chanzuns. Il musicant da musica populara Carlo Brunner preschenta ses nov DC en il studio da SRF Musikwelle, SRF Virus va suenter a la dumonda tge che caracterisescha la cuntrada musicala svizra e sias musicistas e ses musicists e SRF 2 Kultur beneventa la victura dal svizzer grand prix da musica Sol Gabetta. En la televisiun dat SRF zwei in'egliada enavos sin la stad da festivals 2023 cun represchentaziuns da Valentino Vivace e Stereo Luchs al Heitere Open Air.  

En la Svizra franzosa dat il cumponist Cédric Baravaglio in'intervista sin RTS Couleur 3, tar RTS La Première è en visita la musicista Milla ed RTS Option Musique transmetta or dal studio concerts da different:as musicist:as. RTS Espace 2 metta il Festival da musica Label Suisse en il focus.  

Rete Uno festivescha il 18avel anniversari da la plattafurma da musica Mx3 e Rete Due transmetta la prova da la «Serenade per 14 instruments a flad» da Joseph Lauber cun l'Orchestra della Svizzera Italiana (OSI) live da l'auditori Stelio Molo. Ils concerts da Bastian Baker e Nemo al Locarno Film Festival 2024 vegnan emess sin Rete Tre e l'emettur da televisiun RSI LA 2 mussa il concert «MTV Unplugged» dal rapper Stress ed in'intervista cun el. 

Seria da videos al Di da la musica svizra

Aposta per il Di da la musica svizra ha la SRG SSR lantschà sin Mx3, RTR, SRF, RTS e RSI ina seria da videos: nov talents musicals chantan chanzuns dal stgazi da musica svizzer en lieus da la Svizra che han ina gronda muntada simbolica. Las musicistas ed ils musicists èn da chasa en differentas regiuns linguisticas ed en differents stils da musica. Da vesair e d'udir èn Baby Volcano, Jütz, Rudolf Lutz, Prätiger Power, Crème Solaire, Dirty Sound Magnet, Milla, Joya Marleen e Flavio Calaon. La seria da videos cumpletta vegn emessa ils 13 da settember sin Play RTR/ Play RTS/ Play RSI/ Play SRF e Mx3. 

Transmissiuns da concerts dal Festival da musica Label Suisse  

Dals 13 fin ils 15 da settember ha lieu a Losanna la dieschavla ediziun dal Festival da musica Label Suisse che vegn sustegnì da RTS sco partenaria e da Mx3 sco partenaria da medias. Ils concerts dals talents svizzers da tut ils stils da musica pon ins tadlar en directa u da tuttas uras sin ils emetturs da radio da la SRG SSR – il Di da la musica svizra tranter auter il concert da la band The Young Gods (live sin SRF 3 e RTS Couleur 3) u la preschentaziun dal duo Baron.e (live sin RTS Couleur 3).  

Il Di da la musica svizra sin Play Suisse e Mx3 

A partir dals 13 da settember la plattafurma da streaming da la SRG SSR porscha en la collecziun «Di da la musica svizra» ina maschaida particulara da concerts e documentaziuns da musicistas e musicists svizzers. Ils puncts culminants èn il concert «Chantez-Vous Suisse?» dal project da radio da la SRG SSR cun il medem num, la documentaziun «Play with the Devil – Becoming Zeal & Ardor» davart la band Zeal & Ardor che s'orientescha al black metal ed al gospel e ch'è vegnida undrada cun il Premi svizzer da musica 2024, sco er il concert «Concert du Wind Band Neuchâtelois», al qual la Wind Band Neuchâtelois, duas musicistas da la musica classica ed ina jodladra sa represchentan cuminaivlamain.  

Mx3 festivescha ils 15 da settember 18 onns e celebrescha quest eveniment gia il Di da la musica svizra cun ina cumparsa cumplettamain nova dals portals da musica mx3.ch, neo.mx3 e volksmusik.mx3.ch.  

La SRG SSR e la musica svizra  

Saja quai pop, rock, hip hop, electro, musica populara, jazz, opera u classica: la SRG SSR dat a la musica svizra da tut ils stils er ordaifer il di da la musica ina gronda tribuna. En la cunvegna «Charta da la musica svizra», concludida cun la branscha da musica svizra, s'oblighescha la SRG SSR d'emetter en ses programs da radio ina quota commensurada da producziuns da musica svizra. Sin tut ils chanals da radio è la part da musica svizra auta, tar intgins emetturs surpassa quella schizunt 50 pertschient dal temp d'emissiun. Ultra da quai porscha la SRG SSR a giuvnas musicistas ed a giuvens musicists ina plattafurma per promover talents giuvens. In exempel per questas plattafurmas èn las purschidas radar da RTS e Best Talent da SRF 3 che vegnan preschentadas en l'artitgel davart il Public Value da la SRG SSR «Das ist eine riesige Chance» .  

La promoziun da la musica svizra e da musicistas e musicists da la Svizra s'extenda anc sin ulteriurs secturs: sin ils chanals da televisiun emetta la SRG SSR en tut las regiuns linguisticas mintg'onn passa tschient uras registraziuns da concerts da bands svizras, sin la plattafurma da streaming Play Suisse metta ella a disposiziun concerts en directa ed ella surdat ultra da quai premis da promoziun per musica e bands giuvnas. La SRG SSR gestiunescha ultra da quai trais portals da musica naziunals: mx3.ch, neo.mx3.ch e volksmusik.mx3.ch ch'èn stads fin ussa gia per numerus talents giuvens sco Valeska, Kings Elliot, Marius Bear u Danista il punct da partenza per lur carriera. In ulteriur exempel mussa l'artitgel «Co che RTR promova la musica rumantscha». Dapli infurmaziuns porscha il factsheet «Die SRG – Schweizer Musik und Musiker:innen im Fokus».