La SRG SSR beneventa la decisiun dal Cussegl federal da refusar l'iniziativa «200 francs bastan»

La SRG SSR beneventa la tenuta clera dal Cussegl federal cunter l'iniziativa «200 francs bastan». Ed ella è suenter «No Billag» danovamain pronta da demussar tge valur ch'ella porta a la societad cun ses service public audiovisual. Cun approvar l'iniziativa «200 francs bastan» vegnissan ils meds finanzials da la SRG SSR pli u main smesads. Cun in budget talmain reducì na fiss la SRG SSR cun sia structura decentrala odierna e sia purschida multifara betg pli finanziabla. Quai fiss in dir culp per la branscha svizra da film, musica, cultura e sport. 

Sbassar la taxa da medias sco cuntramesira  

Sco cuntramesira ha il Cussegl federal approvà ina revisiun parziala da l'Ordinaziun davart radio e televisiun (ORTV). Sco annunzià il november 2023 vegn sbassada la taxa per las chasadas dad oz 335 francs fin il 2029 en duas etappas sin 300 francs ad onn. Las interpresas cun ina svieuta annuala da fin 1,2 milliuns francs vegnan deliberadas da l'obligaziun da pajar la taxa a partir dal 2027.   

La SRG SSR prenda enconuschientscha da la decisiun dal Cussegl federal. Ella ha prendì posiziun detagliadamain davart quella en il rom da la consultaziun il november 2023 (vesair communicaziun a las medias SRG SSR dals 20 da november 2023).  

Las consequenzas da questa decisiun vegn ella uss ad analisar a fund ed instradar las mesiras necessarias. La SRG SSR stat uschia a l'entschatta d'in process da lunga durada. La taxa per las chasadas vegn sbassada per l'emprima giada a partir dal 2027. Era la deliberaziun da las duas ulteriuras classas da tariffa per las interpresas vegn a succeder a partir da quel mument. Cler è: en il rom da ses meds finanzials vegn la SRG SSR a far tut il pussaivel per garantir vinavant in service public multifar e d'auta qualitad en tut las parts dal pajais. Sco proxim vegn il parlament a discutar davart l'iniziativa «200 francs bastan». 

Mesiras per sbassar ils custs a curta vista  

Pervi da la situaziun finanziala difficila vegn la SRG SSR a prender mesiras da spargn gia a curta vista – independentamain dal sbassament da la taxa da medias decidì dal Cussegl federal. Il motiv èn las entradas da la reclama regressivas e la chareschia. Sin quests svilups durabels vegn la SRG SSR a stuair reagir gia a partir dal 2025.