La fin da l'onn metta la SRG SSR ord funcziun las undas ultracurtas

Avant var diesch onns han l'Uffizi federal da communicaziun (UFCOM), ils radios privats e la SRG SSR cumenzà en stretga collavuraziun a planisar la migraziun da las undas ultracurtas sin DAB+. La prognosa da lezza giada che la tecnologia da DAB+ daventia il nov standard da radio è sa confermada: il diever restant d'undas ultracurtas puras stagnescha sut 10 pertschient. Dapi il 2020 n'è la branscha betg pli obligada da derasar il radio sur questa tecnologia, mantegnair trais tecnologias d'emissiun parallelas è numnadamain char. Perquai ha il cussegl d'administraziun da la SRG SSR decis da betg pli transmetter a partir dals 31 da december 2024 ils programs da la SRG SSR sur las antennas d'undas ultracurtas antiquadas.  

Novas investiziuns en la tecnologia d'undas ultracurtas èn sproporziunadas  

Per la SRG SSR èsi char e perquai sproporziunà da mantegnair e renovar indrizs da transmissiun d'undas ultracurtas. En vista a sia situaziun finanziala difficila pervi da las entradas da reclama regressivas e la chareschia n'èn ulteriuras investiziuns en ina tecnologia da transmissiun antiquada betg pli giustifitgablas. Cun DAB+ ed internet (IP) existan duas pussaivladads da recepziun digitalas che porschan ina meglra qualitad dal tun ed ina pli gronda tscherna da programs, ch'èn pli effizientas dal punct da vista energetic e dals custs e furneschan infurmaziuns supplementaras.  

Per pudair retschaiver DAB+ dovr'ins in apparat u in adapter correspundent. Dapi intgins onns vegnan autos novs equipads en seria cun la tecnologia digitala. Ultra da quai vegn l'Uffizi federal da vias (UVIAS) ad installar en tut ils tunnels da la rait da vias naziunalas la recepziun digitala e medemamain a metter ord funcziun las antennas d'undas ultracurtas.  

A partir da l’atun 2024 vegnan las audituras ed ils auditurs pertutgads preparads sin la finiziun da las undas ultracurtas tras mesiras da communicaziun concretas. 

 

Dossier UKW/UUC