FAQ Play Suisse

Play Suisse è resultà dal giavisch da dar a la purschida ordvart multifara da la SRG SSR ina dimensiun naziunala e da la render accessibla en tut la Svizra. La plattafurma porscha cuntegns da program tenor giavisch, e quai or da tut las regiuns linguisticas da la Svizra. Sin Play Suisse chattan las utilisadras ed ils utilisaders cunzunt atgnas producziuns da las unitads d'interpresa da la SRG SSR (RTR, SRF, RTS e RSI) sco era coproducziuns, a las qualas la SRG SSR participescha en il rom dal Pacte de l'audiovisuel. En il focus èn films documentars e serias documentaras sco era ficziuns (serias e films). En cas singuls vegnan era messas a disposiziun producziuns dal service public estras, sco per exempel la seria tudestga «Der Schwarm» u la collecziun da films documentars, l'European Collection.

Gea. Tut ils cuntegns èn disponibels en la lingua originala cun suttitels tudestgs, franzos e talians. Ina selecziun da titels stat a disposiziun er en rumantsch. Uschenavant ch'ina sincronisaziun è pussaivla, porscha la plattafurma er audioversiuns en differentas linguas. Sche la lingua originala dal cuntegn n'è betg ina lingua naziunala, vegn sche pussaivel era messa a disposiziun quella. 

L'entira purschida da Play Suisse è disponibla en la lingua originala sco era cun suttitels tudestgs, franzos e talians. Ina selecziun da titels stat a disposiziun er en rumantsch. Per tscherts titels è medemamain disponibla ina translaziun dals cuntegns en lingua da segns e cun audiodescripziun. Tut ils cuntegns cun audiodescripziun che stattan a disposiziun sin Play chattais Vus sin la pagina «audiodescripziun».

Play Suisse porscha ina vasta paletta da films, serias, documentaziuns, reportaschas e contribuziuns d'archiv da las differentas parts da la Svizra – en la lingua originala e cun suttitels en trais fin quatter linguas. Play Suisse reunescha en in lieu il meglier da tut las regiuns e fa punts tranter las differentas culturas. En il catalog da Play Suisse chattan las utilisadras ed ils utilisaders numerusas producziuns dals secturs cultura, furmaziun ed infurmaziun – dals «Cuntrasts» rumantschs sur las «Storie» talianas fin al «Temps présent» da la Svizra franzosa e l'emissiun da savida «Einstein» da la Svizra tudestga. Grazia a la structura tematica dal catalog e sistems da recumandaziun persunalisads pon las utilisadras ed ils utilisaders scuvrir purschidas da las autras regiuns linguisticas da la Svizra fin qua nunenconuschentas e profitar d'ina purschida da program bler pli vasta – e quai cura, co e nua ch'els vulan.

Il catalog sa cumpona en emprima lingia d'atgnas producziuns da las unitads d'interpresa da la SRG SSR (RTR, SRF, RTS, RSI) e da coproducziuns, a las qualas la SRG SSR è participada en il rom dal Pacte de l'audiovisuel (serias da film e films da kino). Play Suisse metta il focus sin ficziun sco era sin films documentars e serias documentaras, per ils quals la SRG SSR posseda ils dretgs correspundents. Play Suisse preschenta medemamain ina selecziun da contribuziuns, da las qualas la SRG SSR è partenaria da producziun. Cooperaziuns da festivals pon per exempel esser disponiblas exclusivamain sin Play Suisse. La SRG SSR tscherna titels da las differentas regiuns e dals differents coproducents, cun ils qual la SRG SSR collavura – per represchentar uschia l'entira diversitad linguistica e culturala da la Svizra.

Play RTR e Play Suisse èn duas plattafurmas differentas. Play Suisse è la plattafurma da streaming da la SRG SSR ch'è vegnida creada il november 2020. Ella porscha las meglras atgnas producziuns e las meglras coproducziuns (films, serias, documentaziuns e contribuziuns d'archiv) da RTR, SRF, RTS e RSI ed è per quel motiv in'impurtanta plattafurma naziunala per cuntegns svizzers che funcziunescha independentamain da la televisiun e dal radio linear. Play RTR percunter è ina plattafurma per emissiuns da RTR: là chatt'ins tut quai che vegn emess en ils programs da RTR. Sco livestream ubain per guardar resp. tadlar pli tard.  

Via Play Suisse avais Vus in access illimità als programs da la SRG SSR e quai senza custs supplementars. Play Suisse vegn finanzià cun il budget regular da la SRG SSR. Per las utilisadras ed ils utilisaders na resultan damai nagins custs supplementars.

Datti reclama sin Play Suisse?

Na, sin Play Suisse na datti nagina reclama – tuttina sco sin las autras purschidas online da la SRG SSR. I po però esser che tscherts videos cuntegnan il sponsoring da l'emissiun respectiva mussada en la televisiun. Tenor il dretg da radiodiffusiun è la SRG SSR obligada da preschentar sin Play Suisse il sponsoring respectiv dad emissiuns sponsuradas mussadas en il program ed offertas sin Play Suisse – precis tuttina sco ch'i vala era per l'ulteriura purschida online da la SRG SSR.

Per pudair utilisar la purschida multifara da Play Suisse duvrais Vus sulettamain in login SRG SSR. Quel pudais Vus crear gratuitamain sin la pagina-web da Play Suisse sut «sa registrar».

Play Suisse accentuescha la persunalisaziun e las recumandaziuns: Grazia al login SRG SSR emprenda Play Suisse d'enconuscher Vossas preferenzas e porscha a Vus silsuenter cuntegns ch'As interesseschan. Cun in catalog structurà tenor temas e sistems da recumandaziun persunalisads As envida Play Suisse da scuvrir purschidas fin ussa nunenconuschentas dad autras regiuns linguisticas. Nus desistin d'ina logica commerziala e promovain enstagl ina purschida da programs plurilingua e multifara. Ulteriuras infurmaziuns davart il login SRG SSR e davart la persunalisaziun chattais Vus qua.

Ulteriuras infurmaziuns en connex cun Play Suisse chattais Vus sin www.playsuisse.ch/faq.