Dumondas davart la SRG SSR

SRG stat per Schweizerische Radio- und Fernsehgesellschaft. SSR è l'abreviaziun franzosa (Société suisse de radiodiffusion et télévision), taliana (Società svizzera di radiotelevisione) e rumantscha (Societad svizra da radio e televisiun).

Noss emprims pass avain nus fatg sco emettur d'eroport a Losanna, Genevra e Turitg ed essan ans unids ils 24 da favrer 1931 a la «Schweizerischen Rundspruch-Gesellschaft» (SRG) sco organisaziun tetgala da tut las societads da radio regiunalas. Quel onn avain nus survegnì dal Cussegl federal la concessiun exclusiva per emissiuns da radio en Svizra.

Nus offrin noss programs en tut las quatter linguas naziunalas. Quai vul dir en rumantsch, tudestg, franzos e talian. Tut las regiuns linguisticas èn represchentadas en nossas unitads d'interpresa (RTR, SRF, RTS ed RSI).  En pli disponin nus cun swissinfo.ch d'in servetsch online en diesch linguas per il public internaziunal che s'interessescha per la Svizra.

Vinavant tar la dumonda «Tge è SWI swissinfo.ch?»

Nus, la Societad svizra da radio e televisiun (SSR), essan ina chasa da medias independenta e publica, organisada sco uniun che porscha in service public multimedial en tut las regiuns linguisticas e linguas naziunalas. RTR è ina da nossas tschintg unitads d'interpresa. Ella producescha ed emetta purschidas da radio, televisiun ed online per la Svizra rumantscha. Ultra da las unitads d'interpresa avain nus sco uniun era quatter societads regiunalas che s'engaschan per noss interess. La SRG-Svizra rumantscha (SRG.R) è ina da questas quatter societads regiunalas. La SRG.R ademplescha differentas incumbensas, tranter auter la francaziun da la SRG SSR en la populaziun, la represchentaziun dals interess da las differentas gruppas da la populaziun envers la SRG SSR sco era la promoziun da la discussiun publica davart ils princips ed il svilup dal service public.

La commembranza en la SRG da la Svizra rumantscha, la SRG.R, dat la pussaivladad da concepir l'avegnir medial da la Svizra. Las commembras ed ils commembers promovan il dialog public davart l'avegnir audiovisual da la Svizra e s'engaschan per in service public medial independent. Las commembras ed ils commembers contribueschan interess multifars e pon uschia influenzar nossa interpresa e noss program. Ultra da quai han ellas ed els la pussaivladad da participar ad occurrenzas.

Il Cussegl federal ans incumbensescha da metter a disposiziun ina purschida publicistica per l'exteriur. Questa incumbensa ademplin nus cun las purschidas d'infurmaziun da SWI swissinfo.ch, tvsvizzera.it, TV5 Monde e 3sat.  SWI swissinfo.ch è nossa plattafurma internaziunala da novitads e d'infurmaziun che collia il pajais cun la "tschintgavla Svizra", damai las Svizras ed ils Svizzers, en tut var 800'000, che vivan actualmain a l'exteriur. Ultra da quai è ella per l'exteriur ina fanestra vers la Svizra e vers il mund. Quai grazia a purschidas en diesch linguas.

Na, nus n'essan betg in emettur dal stadi, mabain ina chasa da medias publica ed independenta, organisada en furma d'uniun. L'independenza dal radio e da la televisiun è francada en Svizra en la constituziun ed en la lescha. La lescha da radio e televisiun prescriva che la purschida da programs en ina zona da provediment na dastgia betg servir unilateralmain a tschertas partidas, tscherts interess ubain a tschertas concepziuns dal mund e che «nagin na possia pretender d'in emettur da programs da derasar tschertas represchentaziuns ed infurmaziuns.» (art. 4 e 6 LRTV). Tut las intervenziuns statalas èn pia exclusas e l'independenza da concepir ils programs è garantida.

Nus tschertgain profis e talents da bunamain tut las gruppas professiunalas. Da la televisiun e dal radio, da la tecnica, da l'infurmaziun, dal support e da l'administraziun sco era da l'infrastructura e da la logistica. Ultra da quai purschain nus er atgnas scolaziuns per talents e plazzas d'emprendissadi per l'entrada en la professiun.

Tar nus lavuran 7194 persunas (stadi da la fin da december 2023): 3189 tar SRF, 1876 tar RTS, 1140 tar RSI, 175 tar RTR, 101 tar SWI swissinfo.ch, 406 tar la direcziun generala e tar Business Unit Sport e 312 tar la societad affiliada SWISS TXT.

Nus essan ina patruna cun ina responsabladad sociala ed ans engaschain per cundiziuns da lavur fairas per nossas collavuraturas e noss collavuraturs. Noss contract da lavur collectiv cuntegna cleras reglas davart las cundiziuns da lavur e la relaziun tranter las partidas. Nus promovain activamain secturs sco l'equiliber tranter lavur e vita, la famiglia e la professiun u l'egualitad e la diversitad. Tala moda pon nossas collavuraturas e noss collavuraturs profitar da models da lavur flexibels. A scolaziuns internas ed externas dain nus particularmain paisa. Ulteriuras infurmaziuns chattais Vus qua.

Na. Nossas schurnalistas e noss schurnalists sa stentan per in'objectivitad la pli gronda pussaivla e suttastattan al duair da tegnair enavos l'atgna opiniun. La preschentaziun da la diversitad d'opiniuns da l'entir spectrum politic vegn garantida en noss programs. Mintga unitad d'interpresa dispona da directivas publicisticas. Quellas cumpiglian in catalog da normas che gida a garantir ils standards da qualitad publicistics sco er a respectar il dretg da las medias e l'etica da las medias. Il 2015 ha la Zürcher Hochschule für Angewandte Wissenschaften fatg in studi che ha cumpiglià 909 schurnalistas e schurnalists da l'entira Svizra, tranter auter 163 da la SRG SSR. Schurnalistas e schurnalists da tut las medias èn vegnids supplitgads da valitar lur orientaziun politica sin ina scala da 0 (extremamain a sanestra) fin 10 (extremamain dretga). La valur media da tut las participantas e da tut ils participants ha muntà a 4,02, pia levamain a sanestra da la media aritmetica, ma relativamain entamez. L'autovalitaziun politica n'ha mussà naginas differenzas signifitgantas tranter nossas schurnalistas e noss schurnalists e quels dad autras medias.