Nossas prestaziuns

Temp da lavur

Il temp da lavur emnil per ina plazza a temp cumplain munta tar la SSR a 40 uras. Las collavuraturas ed ils collavuraturs lavuran a basa d'in model da temp da lavur annual.

Lavur davent da chasa / Work Smart

La SSR sustegna la lavur mobila, independenta dal lieu, sche quai è pussaivel e giavischà da las collavuraturas e dals collavuraturs. Grazia a la lavur mobila pon las collavuraturas ed ils collavuraturs exequir lur lavur a moda flexibla ed individuala. Quai pretenda responsabladad persunala e promova a medem temp la qualitad da viver e la creativitad.

Lavur a temp parzial

La SRG SSR pussibilitescha e promova la lavur a temp parzial, era per il cader. Passa la mesadad da las collavuraturas e dals collavuraturs da la SRG SSR lavura a temp parzial (quai vul dir cun in pensum da lavur da main che 90 pertschient). La SRG SSR na publitgescha naginas plazzas mo pli cun in pensum da 100 pertschient. Il pensum maximal è adina tranter 80 e 100 pertschient. La SRG SSR sustegna era soluziuns che prevesan da parter la plazza da lavur e co-direcziuns.

Carriera flexibilisada

Cun avair accumplì il 58avel onn da la vita han las collavuraturas ed ils collavuraturs il dretg da reducir lur grad d'occupaziun per almain 10 pertschient ad onn. En total po il grad d'occupaziun oriund maximalmain vegnir smesà. La paja assicurada en la cassa da pensiun da la SRG SSR (PKS) po vegnir mantegnida, e tant la patruna sco era la lavuranta u il lavurant cuntinueschan a pajar lur cumpart a basa dal pensum d'enfin ussa.

Congedi per mammas e babs

La SSR conceda in congedi da maternitad da 18 emnas respectivamain in congedi da paternitad da 4 emnas. Geniturs da la medema schlattaina han er il dretg ad in congedi da 4 emnas. Ultra da quai han las collavuraturas ed ils collavuraturs il dretg da reducir il grad d'occupaziun a 60 pertschient, cura che lur uffant nascha u vegn adoptà.

Tgira d'uffants

Turitg: Las collavuraturas ed ils collavuraturs da la direcziun generala a Turitg pon dumandar contribuziuns per la tgira da lur uffants ordaifer la famiglia. Responsabel per quellas è il post da cussegliaziun sociala Movis.

Advance – Swiss Women in Business

La SSR è commembra dad «Advance», ina rait da passa 110 interpresas en Svizra. La rait s'engascha per in augment cuntinuant da la quota da dunnas en posiziuns da cader – sin almain 30 pertschient l'onn 2030. La SSR ha cuntanschì questa finamira il 2020 e sa stenta da sa meglierar vinavant. Grazia a la commembranza tar «Advance» pon las collavuraturas ed ils collavuraturs da la SSR profitar da purschidas sco lavuratoris, mentoring ed occurrenzas da networking. 

Diversitad

Dapi il 2020 ha la SSR in Diversity Board naziunal. Il Diversity Board s'engascha per dapli diversitad e cundiziuns da lavurar pli inclusivas en l'interpresa. Il Board definescha la diversitad a moda cumplessiva: tut las collavuraturas e tut ils collavuraturs duain pudair lavurar cun ils medems dretgs, independentamain da lur caracteristicas persunalas sco la schlattaina, la vegliadetgna, l'origin, la religiun, l'orientaziun sexuala, il model da viver u restricziuns. 

La SSR ha in sistem da pajas transparent (vesair era rapport da gestiun da la SSR): la paja correspunda a las pretensiuns, a las prestaziuns ed al martgà. 

13avla paja mensila

Las collavuraturas ed ils collavuraturs da la SSR pon retrair la 13avla paja mensila mintga trais onns dal tuttafatg u per part en furma da vacanzas. 

Egualitad da las pajas

L'egualitad da las pajas è ina finamira centrala da la SSR: mintg'onn vegn quella evaluada cun l'instrument Logib e publitgada en il rapport da gestiun da la SSR. Ultra da quai fa la SSR part dapi il november 2019 da la «Charta per l'egualitad da las pajas» en manaschis parastatals. Cun far part da quella renconuscha la SSR il princip constituziunal «la medema paja per la medema lavur».

Il svilup dal persunal da la SSR cumpiglia la scolaziun ed il perfecziunament da las collavuraturas e dals collavuraturs ed ulteriuras mesiras da promoziun: p.ex. promover la carriera, amplifitgar cuntinuadamain las cumpetenzas e mantegnair a lunga vista las schanzas sin il martgà da lavur. Da princip han las collavuraturas ed ils collavuraturs il dretg a tschintg dis da lavur ad onn per sa scolar e sa perfecziunar.

La SSR d'ina autra perspectiva

Il program da barat intern da la SRG SSR permetta a las collavuraturas ed als collavuraturs d'emprender d'enconuscher las unitads d'interpresa d'ina nova perspectiva, saja quai en in'autra partiziun u en in'autra regiun linguistica. Ultra da quai porscha la SRG SSR a tut:tas collavuratur:as in access ad ina plattafurma digitala d'emprender linguas per rinforzar las atgnas cumpetenzas linguisticas.

Recrutaziun interna per posts da cader

La SSR promova sias collavuraturas e ses collavuraturs. Per quest motiv occupa ella posts da cader vacants tenor pussaivladad cun persunas internas. Quai reussescha en duas da trais plazzas.

Svilup da talents

La SSR vul scuvrir, promover e nizzegiar ils talents individuals e las fermezzas persunalas da las collavuraturas e dals collavuraturs. Per quest intent realisescha ella mintg'onn in program da svilup da talents che sa drizza a collavuraturas e collavuraturs engaschads e talentads. Il program è ina purschida flexibla da moduls e d'instruments che pon vegnir cumbinads individualmain da las participantas e dals participants  – pertge che mintga talent ha in auter punct da partenza e fa ses agen viadi da svilup.

Assicuranza d'accidents

Il persunal da la SSR è assicurà tar la Visana cunter las consequenzas d'accidents da professiun. Las collavuraturas ed ils collavuraturs cun in pensum da passa otg uras l'emna èn assicurads en pli cunter las consequenzas d'accidents ordaifer la professiun. L'assicuranza d'accidents surpiglia en cas d'accident ils custs dal medi e dals medicaments, però er ils custs da differentas metodas da la medischina cumplementara. Grazia a l'assicuranza supplementara cunter accidents è cuvrida er ina gronda part dals custs d'ina dimora a l'ospital. 

Provediment professiunal

Suenter il 19avel onn da vita cumplenì èn las collavuraturas ed ils collavuraturs assicurads cunter vegliadetgna, mort ed invaliditad tar la cassa da pensiun da la SSR (PKS). La purschida da la PKS prevesa in plan da provediment cumplessiv cun ina participaziun als custs surproporziunala da la patruna, ma er in'assicuranza che cumenza baud ed ina contribuziun da spargn voluntara da dus pertschient. Suenter il 58avel onn da vita cumplenì èsi pussaivel da sa laschar pensiunar u era da sa laschar pensiunar parzialmain e lavurar vinavant en in pensum reducì. La PKS cusseglia las collavuraturas ed ils collavuraturs ultra da quai en tut las dumondas davart il provediment professiunal. 

Management da sanadad en il manaschi

La SSR dat gronda paisa a la segirezza durant la lavur e protegia la sanadad da sias collavuraturas e da ses collavuraturs. Cun agid d'in management da sanadad professiunal porscha la SSR activitads e purschidas multifaras, per part en collavuraziun cun cumissiuns da sanadad e clubs da sport regiunals. 

Activitads sportivas

Berna: Il club da sport SSR Berna porscha a las collavuraturas ed als collavuraturs a Berna ina purschida da sport multifara. Quella cumpiglia tranter auter in trenament da currer, curs da nudar, yoga e pilates. Er in local da fitness stat a disposiziun. 
Turitg: Il club da sport e da temp liber da SRF porscha activitads en tschintg spartas: temp liber, ballape, golf, tennis e tennis da maisa.