La cronica da la SSR dapli il 1931
Dus novs emetturs da radio
Il november vegnan lantschads tant DRS 4 News sco era World Radio Switzerland (WRS) ed ils 3 da december cumenza HD suisse ad emetter ses programs – in dals emprims emetturs da service public da l'Europa tenor il standard da televisiun d'auta resoluziun.
Ina cunvegna en favur da las persunas cun senns impedids
La SRG SSR idée suisse e las uniuns da las persunas cun senns impedids pertutgadas suttascrivan ina cunvegna: en l'avegnir duain Schweizer Fernsehen (SF), Télévision Suisse Romande (TSR) e Televisione svizzera di lingua italiana (TSI) porscher in terz da lur program redacziunal cun suttitels per persunas senza udida e persunas cun in'udida restrenschida. La lescha prescriva ultra da quai in'emissiun d'infurmaziun a di en la lingua da segns. Per persunas cun impediments da la vesida duai la SRG SSR idée suisse emetter almain dus films al mais cun audiodescripziun.
Rapport da gestiun 2007
Museum Svizzer da Transports Lucerna
Maletg: Johanna Unternährer/Museum Svizzer da Transports
Il Museum Svizzer da Transports è in museum da traffic e da communicaziun fitg varià. La SSR daventa il 2007 partenaria dal museum svizzer il pli popular.
Mo pli televisiun digitala
Dapi il favrer recepeschan las aspectaturas ed ils aspectaturs ils programs da televisiun da la SSR via antenna sulettamain a moda digitala. La midada da la recepziun analoga a la digitala vegn terminada cun success.
La fin dal radio Beromünster
77 onns suenter sia inauguraziun vegn l'emettur ad undas mesaunas radio Beromünster mess ord funcziun. A la festa populara da dus dis fan part var 15 000 persunas e passa 40 furmaziuns da la musica populara da l'entira Svizra procuran per divertiment.
Dis da litteratura da Soloturn
Maletg: SRF/Urs Lindt
Sur ils dis d'Anzainzas sa transfurma Soloturn mintgamai en il lieu d'inscunter pluriling da la producziun litterara svizra. La SSR daventa partenaria da medias dals Dis da litteratura da Soloturn e sustegna uschia la litteratura svizra.
Rapport da gestiun 2008
Il directur general ha da nov la direcziun operativa
La radunanza da delegadas e delegads da la SRG SSR idée suisse approvescha la revisiun dals statuts da la SSR. Uschia stat la SSR a partir dal 2010 sut la direcziun strategica unitara dal cussegl administrativ da la SSR e sut la direcziun operativa cuntinuanta dal directur general.
La SSR producescha il signal internaziunal per il campiunadi mundial da ciclissem
A Mendrisio ha lieu il campiunadi mundial da ciclissem. La SRG SSR idée suisse producescha sco «Host Broadcaster» il signal internaziunal dal campiunadi. Ella impunda 23 cameras staziunaras ed unitads mobilas cun quatter cameras sin motos ed ina camera en in helicopter.
