La cronica da la SSR dapli il 1931

Il settember suttascrivan la SRG SSR e las associaziuns da l'industria audiovisuala svizra ina nova cunvegna da collavuraziun. Quella vala fin il 2026. Da nov garanteschan las parts contrahentas ina pli gronda transparenza regiunala davart las incumbensas, il volumen da talas e la procedura da surdada. L'entschatta da december vegn la SRG SSR a suttascriver in contract cun las associaziuns per umans cun impediments dals senns: quella reglescha tge emissiuns che vegnan suttituladas e tge cuntegns transcrits u cumplettads cun la lingua da segns. En la cunvegna valaivla fin il 2027 s'oblighescha la SRG SSR da meglierar vinavant l'access a sias purschidas per persunas cun impediments dals senns.

Ils 10 d'avust 2023 inoltrescha in comité burgais a la Chanzlia federala l'iniziativa dal pievel «SRG SSR – 200 francs bastan». Il comité d'iniziativa vul sbassar la taxa per chasadas da 335 francs sin 200 francs e liberar las interpresas dal tuttafatg da la taxa da medias. Il Cussegl federal refusa l'iniziativa il november 2023. Sco cuntramesira prevesa el da sbassar la taxa per chasadas pass per pass – da 335 sin 300 francs l'onn. Ultra da quai vul il Cussegl federal liberar da la taxa da medias las interpresas cun ina svieuta annuala da main che 1,2 milliuns francs.

La SRG SSR conferma ses grond engaschi en favur da la cinematografia svizra ed investescha a partir dal 2024 mintg'onn 34 milliuns francs en il «Pacte de l'audiovisuel». Quai èn 1,5 milliuns francs l'onn dapli che durant la perioda da quatter onns precedenta. La cunvegna da coproducziun tranter la SRG SSR e la branscha da film independenta entra en vigur il 1. da schaner 2024 ed è valaivla enfin la fin dal 2027.

La plattafurma da streaming da la SRG SSR Play Suisse ha trais onns e mez suenter sia lantschada dapli ch'in milliun utilisad:ras registr:adas. Ils cuntegns e las coproducziuns da la SRG SSR èn disponibels sin la plattafurma da streaming mintgamai en la lingua originala cun suttitels tudestgs, franzos, talians e per part era rumantschs. Var 40 pertschient da las utilisadras e dals utilisaders da Play Suisse consumeschan cuntegns d'autras regiuns linguisticas.

Represchentant:as da la SRG SSR e da la branscha da musica svizra suttascrivan la Charta da la musica svizra. Quest contract da collavuraziun ha la finamira da promover la creaziun da musica svizra sco era novs talents e d'augmentar lur visibilitad. Durant la collavuraziun da 20 onns è creschida la pertschientuala da musica svizra emessa en ils radios da la SRG SSR e munta tut tenor l'emettur a passa 50 pertschient dal temp d'emissiun.

La Svizra gudogna la pli gronda concurrenza da musica internaziunala «Eurovision Song Contest» (ESC): Nemo, il talent musical svizzer da 24 onns, cuntanscha l'emprim plaz a Malmö en Svezia. La Svizra è damai il pajais ospitant da l'ESC 2025. La SRG SSR è responsabla per l'organisaziun da questa occurrenza gronda.

Cun Susanne Wille è vegnida elegida ils 25 da matg 2024 per l'emprima giada ina dunna a la testa da la SRG SSR. Dapi il 2001 lavura ella per Schweizer Radio und Fernsehen (SRF), tranter auter sco moderatura da l'emissiun da novitads «10 vor 10», sco correspundenta en la Chasa federala ed a partir dal 2020 sco manadra da partiziun da SRF Kultur. Ella entra en uffizi il november 2024.

Il cussegl d'administraziun da la SRG SSR ha decis da betg pli derasar a partir dals 31 da december 2024 ils programs da radio da la SRG SSR sur las antennas d'undas ultracurtas antiquadas. Dapi il 2020 n'è la branscha da radio numnadamain betg pli obligada d'emetter la tecnologia d'undas ultracurtas, ed il mantegniment da trais tecnologias d'emissiun parallelas è char.