SRG SSR

Dumandas frequentas

Dumandas frequentas

  1. Tgi sto pajar taxas da recepziun?
  2. Quant importan las taxas da recepziun da radio e televisiun?
  3. Pertge pajain nus en Svizra taxas da recepziun da radio e televisiun pli autas ch'en auters stadis da l'Europa?
  4. Tgi incassa las taxas da recepziun?
  5. Poss jau sistir las taxas, sch'ils programs na ma plaschan betg pli?
  6. Stoss jau pajar taxas da recepziun, era sche jau recepesch mo programs esters sur satellit cun ina antenna parabolica?
  7. Stoss jau pajar taxas, sche jau recepesch programs via computer (Live-Streaming)?
  8. Stoss jau annunziar il radio da l'auto?
  9. Stoss jau pajar taxas da recepziun supplementaras per il radio e la televisiun en la chasa da vacanzas?
  10. Stoss jau pajar era taxas da recepziun sper l'attatg a la rait da cabel?
  11. Jau retir prestaziuns supplementaras. Tge duai jau far per vegnir dispensà da l'obligaziun da pajar taxas?

1. Tgi sto pajar taxas da recepziun?

Persunas che vivan en Svizra e che recepeschan programs da radio u televisiun oblighescha la lescha da radio e televisiun (LRTV) da pajar taxas da recepziun, independentamain  da las emissiuns ch'ellas tadlain u guardan ed independentamain via tge vectur (antenna, cabel, satellit, telefon, telefonin, internet) ch'ellas fan quai. En cumparegliaziun: Mo tgi che ha fatg l’examen d’ir cun auto po ir cun auto, e mo tgi che ha pajà las taxas da recepziun po tadlar radio e guardar televisiun. Mintgin dastga però eleger libramain tge auto ch’el cumpra. Medemamain po era mintgin eleger libramain, sch’el vul recepir sias emissiuns via cabel, satellit, antenna, telefon u internet. Liberadas da pajar taxas pon vegnir mo persunas cun dretg a prestaziuns da l'AVS e da l'AI che retiran prestaziuns tenor la Lescha federala davart las prestaziuns supplementaras tar l'assicuranza da vegls, survivents ed invaliditad.

2. Quant importan las taxas da recepziun da radio e televisiun?

Persunas privatas pajan CHF 165.00 per recepir programs da radio e CHF 286.10 per recepir programs da televisiun.

Las taxas per la recepziun professiunala e commerziala pon vegnir consultadas sin la website da la Billag SA (www.billag.com).

3. Pertge pajain nus en Svizra taxas da recepziun da radio e televisiun pli autas ch'en auters stadis da l'Europa?

La SSR producescha en tut las quatter regiuns linguisticas programs equivalents. Quai è la voluntad politica per garantir il service public. Da preschent cumpiglia l'offerta 7 programs da televisiun e 17 programs da radio. Per in pitschen pajais sco la Svizra è quai relativamain bler, en vista a la concurrenza idigena dals emetturs da radio e la concurrenza estra dals emetturs da televisiun dentant absolutamain necessari. En auters pajais europeics - en blers vegn discurrida mo ina lingua - èn repartidas las taxas sin bler dapli chasadas, perquai èn las taxas per mintga singul pli bassas. Ultra da quai vegnan sustegnids ils emetturs statals en tscherts pajais cun daners da taglia.

4. Tgi incassa las taxas da recepziun?

La Billag SA incassa las taxas da recepziun. Formulars per s'annunziar e desdir la concession e per inditgar midadas d'adressa chattais Vus sin la pagina da la Billag SA (www.billag.com).

5. Poss jau sistir las taxas, sch'ils programs na ma plaschan betg pli?

Entant che Vus possedais apparats da radio e/u da televisiun pronts per funcziunar, essas Vus obligà da s'annunziar tar la Billag e da pajar las taxas. Sche Vus na pajais betg ellas, essas Vus in telespectatur senza concessiun e survegnis da la Billag in'admoniziun, sche necessari As stumescha ella era. Sche Vus desdis la concessiun e disponis vinavant d'apparats pronts per funczinar, essas Vus punibel tenor artitgel 68 da la lescha da radio e televisiun (LRTV) actuala.

6. Stoss jau pajar taxas da recepziun, era sche jau recepesch mo programs esters sur satellit cun ina antenna parabolica?

Las taxas vegnan pajadas a la Confederaziun per pudair recepir programs. Tge programs ch'ins recepescha en tge moda na gioga nagina rolla.

7. Stoss jau pajar taxas, sche jau recepesch programs via computer (Live-Streaming)?

Da princip ston ins annunziar e pajar per quella recepziun da programs. Tgi che ha dentant gia annunzià ses apparat da radio e/u da televisiun convenziunal na sto betg s'annunziar anc ina giada per pudair recepir ils programs via computer, damai che las taxas vegnan pajadas per chasada. Tgi che n'ha annunzià ni in radio ni ina televisiun sto daventar activ en ina da las suandantas situaziuns:

  • recepziun da programs da radio: access a l'internet via ISDN u attatg a spectrum lartg (p.es. DSL, rait da cabel, etc.), recepziun sur software correspundenta (p.ex. Mediaplayer, RealOne Player).
  • recepziun da programs da televisiun: access a l'internet via attatg a spectrum lartg (p.ex. DSL, rait da cabel), recepziun sur software correspundenta (p.ex. Mediaplayer, RealOne Player), far in abunament cun obligaziun da surpigliar ils custs per la recepziun da programs da televisiun u registraziun tar in purschider che offra gratuitamain access a programs da televisiun.

8. Stoss jau annunziar il radio da l'auto?

La recepziun da programs da radio sto vegnir annunziada e pajada, era sch'ins dovra mo in radio d'auto. Sche Vossa chasada è dentant gia annunziada vala l'annunzia era per il radio da l'auto.

9. Stoss jau pajar taxas da recepziun supplementaras per il radio e la televisiun en la chasa da vacanzas?

Sche la chasa da vacanzas na vegn betg dada en locaziuns valan ils apparats sco annunziads, premess che Vus avais annunzià la recepziun privata en Voss domicil usità. Sche la chasa da vacanzas vegn dentant affittada, ston ins pajar las taxas per la recepziun commerziala (vesair la tabella da taxas sin la pagina web da la Billag SA www.billag.com).

10. Stoss jau pajar era taxas da recepziun sper l'attatg a la rait da cabel?

L'attatg a la rait da cabel e las taxas da recepziun n'han da far nagut ina cun l'autra. L'offerta da la rait da cabel sa basa sin in contract da dretg privat che Vus faschais cun l'administratur da la rait da cabel. Sin fundament da quel survegnis Vus ils programs en ina tscherta qualitad en chasa. La taxa da recepziun pajais Vus a la Confederaziun, sche Vus possedais apparats da radio e/u da televisiun pronts per funcziunar.

11. Jau retir prestaziuns supplementaras. Tge duai jau far per vegnir dispensà da l'obligaziun da pajar taxas?

Persunas che retiran supplementarmamain a lur renta da l'AVS u da l'AI prestaziuns da la Confederaziun, èn dispensadas da l'obligaziun da pajar taxas. Ellas ston però far ina dumonda en scrit a la Billag SA ed agiuntar a quella ina conferma da la cassa da cumpensaziun ch’ellas obtegnian questas prestaziuns supplementaras.

Link

RSIRTRRTSSRFSWI