SRG SSR

Sport

Sport

Il sport fascinescha – è plain emoziun e tensiun. El unescha ils umans suror ils cunfins linguistics e culturals. Perquai s’engascha la SSR fitg per il sport.
Il sport è ina part impurtanta da l’incumbensa da servetsch public da la SSR. La SSR cun sias unitads d’interpresa SRF,RTS, RSI e RTR prenda en mira ils sportists e las sportistas svizras cun attracziun naziunala ed internaziunala, ed ella porscha al public in vast program da sport adattà als basegns dals Svizzers sin tut ils vecturs (radio, tv ed online) cun highlights da la Svizra e da l’exteriur. Il sport è pura tensiun: il public persequitescha cun tensiun ils eveniments e viva muments emoziunals.

Reportascha da sport multifara

La SSR ha ina posiziun publicistica dominanta en il sectur dal sport. Il sport è in element central da la strategia da program e cun quai er dals programs da la SSR sco tals. En ses programs da radio e televisiun e sin las plattafurmas da multimedia rapporta la SSR regularmain da passa 60 differentas disciplinas. E cun sia strategia da sport sa sfadia ella da preschentar mintga di ina purschida attractiva, confurma al public ed adattada al martgà. Per cuntanscher quella finamira ademplescha la SSR – en il rom da sias pussaivladads economicas, productivas ed organisatoricas – las spetgas dal public svizzer cun cuntegns dal sport sin tut ils vecturs tenor il model da trais pitgas:

Il model da trais pitgas

La classificaziun da disciplinas resp. eveniments da sport succeda tenor criteris schurnalistics, strategics, finanzials, dal program e da la politica da sport. Elementar è che betg singulas disciplinas u events stattan en il center, mabain che l’equiliber tranter las trais pitgas, sin las qualas il sport da la SSR sa basa, è garantì. Il sport è ina part integranta per la realisaziun dal servetsch public. La successiun da las pitgas reflectescha da princip lur priorisaziun.

Sportistas e sportists svizzers Eveniments da sport en Svizra Events impurtants internaziunals
Da quels fan part sportistas e sportists sco Roger Federer, Stan Wawrinka, Nicola Spirig, Lara Gut, Simon Ammann, Tom Lüthi, Dario Cologna, Fabian Cancellara, dentant er disciplinas sco per exempel remblar ed ir a chaval. Da quels fan part occurrenzas sco cursas da skis ad Adelboden e Wengen, atletica leva da la classa mundiala a Turitg, l’Athletissima a Losanna, il Tour de Suisse, il Tour de Romandie, occurrenzas da sport cun chaval, la cuppa Spengler, campiunadis naziunals da ballape e da hockey, il Golf European Masters Crans-Montana, il «mund da remblar» a Lucerna, il Beachvolleyball Gstaad, ils Tennis Swiss Indoors u la festa da lutgaders e signuns. Quai èn highlights dal sport mundial sco gieus olimpics, campiunadis mundials ed europeics da ballape, la UEFA Champions e Europa League, la furmla 1, campiunadis mundials da skis, il Tour de France, campiunadis mundials ed europeics d’atletica leva u turniers da tennis da grand slam.

La reportascha da sport sin las plattafurmas da la SSR ha la finamira da mussar la realitad da sport dal punct da vista svizzer. Per il public svizzer vegnan elavurads cuntegns relevants en buna qualitad ed adattads al vectur. Cun events spezials ed atgnas producziuns contribuescha la SSR a l’identitad ed al spiert da cuminanza da la Svizra.

Unitad organisatorica Business Unit Sport

Cun la Business Unit Sport (BUS) dispona la SSR d’in center da cumpetenza convergent, naziunal en ils secturs producziuns, eveniments gronds, dretgs da sport e marketing ed events cun las incumbensas servetsch, direcziun e controlling. Ella è responsabla per la realisaziun da la strategia da sport en ils programs da sport da la SSR. La BUS cumpra d’ina vart centralmain tut ils dretgs da sport per la SSR e sias unitads d’interpresa e dirigia la producziun d’occurrenzas da sport naziunalas. Da l’autra vart organisescha e coordinescha ella per tut las unitads d’interpresa e lur vecturs projects gronds internaziunals sco gieus olimpics u campiunadis mundials ed europeics. En pli economisescha la BUS ils preventivs da sport naziunals e pissera per ina represchentanza cunvegnenta al lieu.

Las sfidas dal sport

  • Gronda diversitad: L’impurtanza da sports telegens crescha ad in crescher. Uschenumnads sports da premium sco la furmla 1 e ballape ed occurrenzas da premium sco gieus olimpics, campiunadis mundials ed europeics da ballape u la UEFA Champions League vegnan a rinforzar lur posiziun dominanta. En il martgà da sport globalisà sa diminuescha l’impurtanza da sports tradiziunals sco l’atletica leva, il ciclissem, ir a chaval, remblar, far gimnastica u nudar en tut il mund. Cun sia strategia da sport cumbatta la SSR quella tendenza en l’intschess svizzer, ella vul porscher al public vinavant ina gronda paletta da transmissiuns e rinforzar cun quai la diversitad d’eveniments svizzers cun attracziun naziunala ed internaziunala.
  • Transparenza en cas da maldiever ed engion: Ils schurnalists e las schurnalistas da sport da la SSR salvan la distanza necessaria tant dals eveniments sco dals atlets. Els rapportan en moda transparenta, critica, objectiva e senza pregiudizis – er d’eveniments e d’aspects negativs enturn il sport sco excess en ils stadions, engion, corrupziun e delicts da doping.



Video: il service public ed il sport

Metro

Tge è l'incumbensa da la SSR? Tge signifitga service public? Las respostas a questas ed a bleras ulteriuras dumondas chattais Vus sin SSR Metro.

Paginas d'internet da la SSR

Videoclips SSR

videoclips sport SRGSSR
RSIRTRRTSSRFSWI