SRG SSR

Qualitad

Qualitad

Tge è qualitad?

La qualitad è impurtanta. La qualitad è ina valur. Tuts accentueschan la qualitad, tuts la stiman, tuts la vulessan cuntanscher. Ma tge è qualitad exactamain? Savens empruvain nus da respunder a questa dumonda cun menziunar intgins exempels, perquai ch’igl è difficil da dar ina definiziun. Strusch in’autra noziun ha uschè bleras connotaziuns positivas ed è tuttina uschè difficila da descriver. Il problem è che mintga definiziun da la qualitad dependa dal sistem da valurs individual da quel che la giuditgescha. Ils profis da la SRG SSR giuditgeschan cun auters egls la qualitad dal program ch’il public; l’Uffizi federal da communicaziun sco autoritad da surveglianza ha anc ina giada in’autra vista. Per pudair mesirar e giuditgar la qualitad èsi necessari da sa cunvegnir davart ils criteris.

Cuntrari ad ina firma privata che po definir ses criteris da qualitad cun ina tscherta autonomia, sto in’interpresa cun in’incumbensa publica sco la SSR resguardar autras reglas. La concessiun menziuna quatter dimensiuns da qualitad surordinadas: relevanza, credibladad, senn da responsabladad e professiunalitad schurnalistica.

Ultra da quests standards naziunals existan er ils criteris e las finamiras da qualitad che mintga unitad d’interpresa – fin a la pli pitschna redacziun – fixescha sezza. I sa tracta surtut da pretensiuns liadas fitg concretamain a l’activitad schurnalistica.

Sper la legislaziun e las pretensiuns che la SSR s’impona sezza, datti però anc ina terza instanza che gioga ina rolla essenziala per definir la qualitad: il public.

Co garantescha la SSR la qualitad?

Per garantir la qualitad sto la SSR enconuscher uschè bain sco pussaivel las dimensiuns ch’ella vul mesirar. Las quotas e las enquistas regularas permettan d’eruir la perspectiva dal public.

Per examinar las finamiras da qualitad definidas da la lescha (ed era tut las ulteriuras), applitgescha la SSR ils standards minimals per la garanzia da qualitad en tut las quatter regiuns linguisticas e per Swissinfo.

 

Qualitaet Schema r

Ils standards minimals cumpiglian per gronda part process standardisads, pertge ch’els èn la clav da l’entir sistem da garanzia da la qualitad.

Era l’organisaziun purtadra da la SSR ha l’incumbensa da valitar la qualitad dals products da la SSR: uschia dispona mintga societad regiunala d’in cussegl dal public che s’occupa regularmain ed intensivamain da la qualitad da ses programs.

E la finala incumbensescha era l’Uffizi federal da communicaziun mintg’onn instituts independents – per il solit universitads – d’analisar il program da la SSR.  

Grafik Bakom rum

Il sectur «Martgads e qualitad» fa part dal stab dal directur general e procura che tut questas mesiras, controllas ed infurmaziuns davart la qualitad dals programs circuleschian a moda correcta ed effizienta. E per garantir la qualitad n’èsi betg il davos er impurtant da discurrer davart la qualitad.

Pertge sa fatschentar cun la qualitad?

La SSR è la pli gronda chasa da medias da la Svizra e vegn finanziada oravant tut sur las taxas. Sco interpresa da service public sustegna ella cun ses rapports multifars fermamain las burgaisas ed ils burgais ad exercitar lur dretgs democratics. Cun la digitalisaziun creschenta daventa il mund da las medias adina pli cumplex; tras quai èsi adina pli difficil da separar las novitads relevantas e fidadas da las infurmaziuns nunfiltradas e nuncontrolladas. Tut quai èn buns motivs pertge che la SSR sa fatschenta cun seriusadad da la qualitad. Nus ans engaschain per la qualitad, pertge che nus essan persvas ch’ella è in’investiziun en la democrazia

RSIRTRRTSSRFSWI