SRG SSR

Infurmaziun

Infurmaziun

Las novitads e las emissiuns d'infurmaziun da la SSR permettan ina vista independenta ord optica svizra sin quai che capita en noss pajais ed a l'exteriur. Quella è impurtanta per la cultura politica en Svizra.


Cun sias purschidas da radio, televisiun ed internet offra la SSR in service public medial. E grazia a sia independenza po ella garantir ina purschida d'infurmaziun actuala, equilibrada e faira ch'è en quella furma unica en Svizra.


Charta da program

La charta da program determinescha las basas che duain valair per ils programs da radio e televisiun da la SSR. Ella garantescha ch'ils programs sa distinguan tras la qualitad dal cuntegn e da la furma. La charta da program pretenda da s'orientar a standards etics e professiunals e da resguardar ils basegns dal public. Ella accentuescha l'independenza da la SSR e sia responsabladad envers la societad. La Charta pretenda da betg sa laschar corrumper e da s'avischinar tant sco pussaivel a la vardad. Ultra da quai suttastritga ella la funcziun da la SSR da furmar l'opiniun e numna las premissas necessarias per pudair far quai.


Directivas publicisticas

Sin il stgalim da las unitads d'interpresa prescrivan las directivas publicisticas e redacziunalas co ch'ins po evitar collisiuns d'interess, in schurnalissem da favur u l'influenza da las relaziuns publicas. Questas directivas duain garantir in'infurmaziun credibla, independenta e pluralistica. A medem temp èn talas disposiziuns er in codex da cumportament professiunal ed etic, tenor il qual ils collavuraturs da la SSR ston s'orientar. Las directivas redacziunalas correspundan per gronda part a la «Decleranza dals duairs e dals dretgs dals schurnalists» dal Cussegl svizzer da la pressa. 


Incumbensa d'infurmaziun radio

En il radio furman las novitads da mintg'ura ed ils schurnals regiunals, sco era las infurmaziuns davart il sport e l'aura, la basa da l'incumbensa d'infurmaziun. En pli permettan emissiuns sco «Echo der Zeit», «Doppelpunkt», «Input» u «Info 3» al public da s'approfundar a moda pli detagliada ed analitica cun temas actuals.

In studi realisà il 2008 da l'Universitad da Genevra per incumbensa da l'Uffizi federal da communicaziun (UFCOM) ha confermà l'aut cuntegn d'infurmaziun dals programs da radio da la SSR: «Ils emprims programs da las trais regiuns linguisticas sa cumponan tranter las 6.00 e las 22.00 d'ina cumpart discurrida da tranter 57 pertschient (Radio SRF 1) ed 82 pertschient (La Première). Las infurmaziuns furman ina part impurtanta da la purschida: tar La Première èn quai var dus terzs dal temp d'emissiun, tar Rete Uno e Radio SRF 1 circa in terz. Ina gronda part da quellas infurmaziuns vegn intermediada sper las novitads.» 


Incumbensa d'infurmaziun TV

Era cun ils programs da televisiun ademplescha la SSR si'incumbensa d'infurmaziun: cun emissiuns sco «Tagesschau» u «10vor10» metta ella l'accent infurmativ sin quai che capita en Svizra ed a l'exteriur – e cun emissiuns sco «Schweiz aktuell» rapporta ella d'eveniments regiunals. Tar ils formats che approfundeschan e reflecteschan eveniments actuals tutgan las emissiuns d'infurmaziun sco «Rundschau», «Club», «Kassensturz» u «Arena».

In studi d'Univox ha attestà il 2007 la muntada dals programs da televisiun da la SSR sco medias d'infurmaziun: «En l'utilisaziun da las medias orientada a l'infurmaziun servan ils programs da la SSR a 57 pertschient da la populaziun en emprima u segunda lingia sco funtaunas d'infurmaziun, las gasettas dal di mo a 52 pertschient (...). (...) Ils programs da televisiun svizzers privats giogan tant areguard l'infurmaziun sco er areguard il divertiment mo ina pitschna rolla.»


Ina purschida d'infurmaziun extendida

  • Paginas web dals emetturs: Cun la digitalisaziun da las medias sa midan ils basegns dals consuments da medias. Las interpresas da radio e televisiun da la SSR tegnan quint da questas midadas e porschan paginas web che cumpletteschan ed approfundeschan la purschida da program.

  • Podcasts e streams: Plattafurmas per audio resp. video on demand permettan al public da tadlar resp. guardar sur l'internet entiras emissiuns da radio e televisiun u singulas contribuziuns sco live stream – u da tuttas uras sco podcast ubain stream.

  • Teletext: Las infurmaziuns curtas via Teletext èn anc adina fitg dumandadas tar il public: il dumber d'utilisaders è sa stabilisà sin in aut nivel dad 1 milliun per di.

  • Swissinfo: La pagina web www.swissinfo.ch offra infurmaziuns davart la Svizra en furma da contribuziuns da text, maletg, tun e video en 10 linguas. Prioritad han las infurmaziuns dals secturs politica, economia, cultura, scienza, furmaziun e sport. Swissinfo prepara quests temas en emprima lingia per in public internaziunal. Per ils Svizzers a l'exteriur stattan ultra da quai a disposiziun infurmaziuns davart las votaziuns e las elecziuns.


Incumbensa d'infurmaziun politica

Ils rapports da las debattas parlamentaras èn ina part integrala dals programs da radio e televisiun da la SSR: els infurmeschan davart votaziuns federalas e chantunalas e promovan uschia la furmaziun da l'opiniun politica. Era las elecziuns da l'Assamblea federala e las elecziuns dal Cussegl federal emetta la SSR adina en directa e las lascha commentar dad experts.

Per pussibilitar rapports regulars e directs or da la Chasa federala ha la SSR endrizzà en il Center da medias da la Confederaziun in studio da televisiun e plirs studios da radio – l'uschenumnà Center da producziun Chasa federala.


Infurmaziun en situaziuns da crisa

En cas d'ina gronda crisa è la SSR l'organ d'infurmaziun uffizial dal Cussegl federal. Cunvegnas da prestaziun cun l'Agentura telegrafica svizra ATS e la SSR garanteschan ch'il Cussegl federal po sa drizzar da tut temp a la populaziun.

Sch'igl è necessari da dar a la populaziun directivas da cumportament concretas, pon las autoritads instradar ina annunzia d'alarm sur il sistem d'infurmaziun Icaro (Information Catastrophe Alarme Radio Organisation). En quest cas gioga il radio in'impurtanta rolla sco medium il pli spert: la SSR interrumpa ses programs da radio per communicaziuns impurtantas en cas d'in alarm da sirenas general. 

RSIRTRRTSSRFSWI