SRG SSR

Furmaziun

Furmaziun

Cun sia vasta paletta d'emissiuns da radio e televisiun intermediescha la SSR savida e procura per la furmaziun dal public. Ma er ordaifer ils programs contribuescha ella a la furmaziun: ella sustegna museums, exposiziuns ed occurrenzas.


La furmaziun e la savida èn facturs da success: els han in'influenza directa sin la perscrutaziun ed il svilup, sin la lavur e l'economia, sco era sin il cumportament social u l'organisaziun dal temp liber dals umans. Perquai èn las tematicas instructivas ed educativas ina da las pitgas principalas da l'incumbensa da service public da la SSR.


Basas legalas

L'artitgel 93 da la Constituziun federala (CF) determinescha ch'il radio e la televisiun ston contribuir al svilup cultural, a la furmaziun libra da l'opiniun ed al divertiment.

En l'artitgel 24 da la lescha da radio e televisiun (LRTV), sco er en la concessiun, statti scrit che la SSR contribuescha a la furmaziun dal public, cunzunt cun emetter regularmain emissiuns cun in cuntegn instructiv.


Incumbensa da furmar l'opiniun politica

Ina democrazia funcziunanta dovra burgais bain infurmads. Perquai giogan las emissiuns d'infurmaziun da la SSR ina rolla impurtanta: ellas pussibiliteschan al public ina vista ord optica svizra sin la politica en Svizra ed a l'exteriur. Ultra da quai è la constanza, cun la quala la SSR tematisescha dumondas essenzialas, in agid d'orientaziun per il public.

In'incumbensa da la SSR è d'infurmar il public davart votaziuns federalas e da promover la furmaziun da l'opiniun dals votants. Perquai èn ils rapports da las debattas parlamentaras ina part integrala dals programs da radio e televisiun da la SSR. Era las elecziuns da l'Assamblea federala e dal Cussegl federal emetta la SSR adina en directa e las lascha commentar dad experts. Per pussibilitar rapports regulars e directs or da la Chasa federala ha la SSR endrizzà en il Center da medias da la Confederaziun in studio da televisiun e plirs studios da radio – l'uschenumnà Center da producziun Chasa federala.


Savida e furmaziun grazia a radio e televisiun

La gronda part da las emissiuns da radio e televisiun da la SSR na vegn betg producida cun l'intenziun da scolar il public, ellas han però in effect instructiv: da quellas fan part emissiuns davart la protecziun dals consuments, davart la medischina, animals e la natira, sco era magazins da viadi, da cultura u d'economia. La SSR porscha damai mintga di emissiuns da radio e televisiun d'auta qualitad cun cuntegns educativs ed ademplescha ina funcziun da cussegliadra per differentas gruppas da vegliadetgna.

  • Radio: SRF porscha p.ex. emissiuns sco «Kontext», «Perspektiven», «Echo der Zeit», «Doppelpunkt», «Espresso» e «Ratgeber»; per uffants datti tranter auter il program «Zambo». RSR transmetta emissiuns sco «Atlas», «Impatience», «On en parle», «Histoire Vivante», «Médialogues» ubain l'emissiun per uffants «Les Zèbres». RSI producescha las emissiuns «Dentro le cose» ubain «Natura sott’occhio» e Radio Rumantsch las emissiuns «Forum», «Marella» ubain «Tavulin litterar».

  • Televisiun: In cuntegn instructiv han tar SRF las emissiuns «DOK», «Horizonte», «Einstein», «NETZ NATUR», «kulturplatz», «Puls», «Kassensturz», «Rundschau» e «SRF Wissen mySchool»; tar RTS èn quai emissiuns sco «A Bon Entendeur», «36,9°», «Geopolitis», «Histoire des savoirs», «Passe-moi les jumelles», «TTC» ubain «Les docs»; RSI transmetta l'emissiun «Il giardino di Albert» u «Il filo della storia» e RTR «Cuntrasts».

  • Interactivitad: Numerusas da las emissiuns da radio e televisiun menziunadas sura integreschan dumondas dal public en il program e creeschan uschia in contact direct cun il public. Via hotlines u forums d'internet pon persunas interessadas far dumondas individualas ad experts durant u era suenter l'emissiun, p.ex. ad in team da medis en l'emissiun da SRF «Puls» ubain a spezialists en l'emissiun da radio da RTS «On en parle».

  • Visitas en il studio: Las unitads d'interpresa da la SSR organiseschan regularmain per classas ed autras gruppas visitas guidadas tras ils studios da radio e televisiun.


Savida e furmaziun grazia a l'internet

La SSR renda accessibla en l'internet sia savida fundada. Tras quella offerta extenda ella a moda marcanta si'incumbensa da furmaziun. La basa da sia purschida furman emissiuns da radio e televisiun actualas, las qualas ins po clamar giu sco podcast u stream. Per esser anc pli datiers dal public publitgescha la SSR tscherts cuntegns era sin plattafurmas estras sco p.ex. YouTube. L'onn 2014 èn las offertas d'internet da la SSR vegnidas visitadas en total 1,5 milliuns giadas (visits) per di.  

Unitad d'interpresa Website
SRF Schweizer Radio und Fernsehenwww.srf.ch/wissen
RTS Radio Télévision Suissewww.rts.ch/decouverte
SRG Timeline – l'archiv audiovisual da la Svizrawww.srgssr.ch/timeline

Questas plattafurmas èn interessantas tant per scolasts e scolars, sco era per persunas privatas. Ellas cuntegnan numerusas contribuziuns e dossiers davart ina vasta paletta da temas, da la medischina, il clima, l'energia e la perscrutaziun sur l'economia, la politica e la religiun fin al sport.


Promoziun da la furmaziun ordaifer il radio e la televisiun

En il senn d'ina promoziun da la furmaziun datti cooperaziuns cun autras instituziuns e per part partenadis da medias da blers onns:

  • Fondation du Centre Romand de Formation des Journalistes: La SSR è commembra fundatura dal Centre Romand de Formation des Journalistes (www.crfj.ch).

  • MAZ – la Scola svizra da schurnalissem: La SSR fa part dal cussegl da fundaziun dal MAZ (www.maz.ch).



  • Memoriav: Memoriav è in'associaziun per il mantegniment dal patrimoni audiovisual da la Svizra (www.memoriav.ch).

  • Fonoteca Naziunala Svizra: Ella ha l'incumbensa da collectar, render accessibels e metter a disposiziun al public tut ils portatuns che han tras lur cuntegn in liom cun l'istorgia e la cultura da la Svizra (www.fonoteca.ch).

  • FSFA – Fundaziun svizra per la furmaziun tras purschidas audiovisualas: La FSFA ha la funcziun d'ina rait. SRF è commember dapi blers onns (www.ssab-online.ch).
RSIRTRRTSSRFSWI