SRG SSR

Diversitad

Diversitad

La SSR s'orientescha als basegns multifars da la Svizra plurilingua e multiculturala. La diversitad è perquai in aspect central en las purschidas, las emissiuns ed ils puncts da vista da la SSR.


Cun il vast spectrum da ses programs da radio e televisiun represchenta la SSR la Svizra plurilingua e multiculturala. Ed il medem mument influenzescha la Svizra multifara ils formats, ils cuntegns ed ils puncts da vista da la SSR – e quai en ils secturs infurmaziun, cultura, furmaziun, sport e divertiment. Perquai è la diversitad in dals garants per sia posiziun dominanta sin il martgà ed ina valur essenziala da ses maletg directiv – sper la credibladad, l'independenza, la creativitad e la fairness.


In'incumbensa da program multifara

L'artitgel 93 da la Constituziun federala determinescha che la legislaziun davart radio e televisiun cumpeta a la Confederaziun. Il radio e la televisiun duain contribuir a la furmaziun, al svilup cultural, a la furmaziun libra da l'opiniun ed al divertiment, resguardar las particularitads dal pajais ed ils basegns dals chantuns, preschentar ils eveniments a moda correcta ed exprimer adequatamain ils differents avis.

La concessiun precisescha l'incumbensa che la SSR ha d'ademplir cun tut ses programs da radio e televisiun, sco era cun autras offertas publicisticas en las regiuns linguisticas respectivas. La concessiun fixescha ulteriurs puncts:  

  • permetter al public ina libra furmaziun da l'opiniun entras in'infurmaziun cumplessiva, multifara ed objectiva surtut davart temas politics, economics e socials

  • promover il svilup cultural e rinforzar las valurs culturalas dal pajais sco era la cultura svizra resguardond surtut la litteratura, la musica e la lavur cinematografica svizra

  • pussibilitar ina furmaziun dal public, cunzunt cun emetter regularmain emissiuns cun in cuntegn instructiv

  • offrir emissiuns da divertiment che satisfan als differents basegns dal public.

La diversitad en il radio

SRG Radio-Karte


Cun ses programs da radio satisfa la SSR als divers interess e basegns dal public. Ed uschè differents sco quai ch'ils cuntegns da program èn, uschè differents èn er ils geners ed ils formats – p.ex. las emissiuns d'infurmaziun, ils gieus auditivs, ils quizs, las intervistas u ils concerts sin giavisch.

 

Cuntegn da program radio 2015

             

    

La diversitad en la televisiun

SRG TV-Karte rm


Er en la televisiun fa la SSR tut il pussaivel per producir cun differents geners e formats mintga di in program multifar che satisfa a las differentas pretaisas ed opiniuns dal public – cun quizs, emissiuns da musica, d'infurmaziun, da cussegliaziun e da discussiun, sco era sitcoms, serias u films dramatics.

 

Cuntegn da program televisiun 2015

         


La digitalisaziun porscha anc dapli diversitad

  • Paginas web dals emetturs: Cun la digitalisaziun da las medias sa midan ils basegns dals consuments. Las interpresas da radio e televisiun da la SSR tegnan quint da questas midadas e porschan paginas web che cumpletteschan ed approfundeschan la purschida da program.

  • Podcasts e streams: Plattafurmas per datotecas d'audio e da video on demand pussibiliteschan al public da tadlar resp. guardar entiras emissiuns da radio resp. da televisiun u singulas contribuziuns per part schizunt en directa via internet – ubain da tuttas uras sco podcast u stream. Intginas plattafurmas po il public schizunt gidar a concepir, sco p.ex. las plattafurmas da musica www.vxm.ch (Il portal da la musica populara svizra) ubain www.mx3.ch (The Swiss Music Portal).

  • Teletext: Ils rapports curts da Teletext vegnan anc adina appreziads fermamain dal public. Il dumber d'utilisaders è sa stabilisà sin in aut nivel dad 1 milliun per di.

  • Swissinfo: www.swissinfo.ch offra novitads davart la Svizra en contribuziuns da text, maletg, tun e video en 10 linguas. Swissinfo elavura ils temas per in public internaziunal. Per las Svizras ed ils Svizzers a l'exteriur stattan ultra da quai a disposiziun infurmaziuns davart las votaziuns e las elecziuns. 
RSIRTRRTSSRFSWI