SRG SSR

Strategia d'interpresa

Strategia d'interpresa

La strategia d'interpresa resguarda tut ils secturs da l'interpresa, externs (purschida e martgà, incumbensa) ed interns (process, finanzas, persunal). Ella mussa la direcziun, en la quala la SSR duai sa sviluppar. Da quella deduceschan las unitads d'interpresa (RSI, RTR, RTS, SRF, SWI), ils secturs spezials (operaziuns, finanzas) e las societads affiliadas mintgamai lur strategias parzialas. Las prescripziuns strategicas en connex cun la purschida mettan il rom per il svilup da la purschida linguistic-regiunala u surregiunala da la SSR. Da quellas deduceschan ils responsabels da program e da producziun ils puncts centrals per lur secturs. 

La strategia è vegnida revedida 2016 e las finamiras intensivadas. Ella è uschia pli bain chapibla e focussada sin l'essenzial: la transfurmaziun digitala cun tut sias influenzas sin la purschida, il persunal, las finanzas ed ils conturns dal martgà. Nov cumpiglia la strategia d'interpresa 9 empè da co fin qua 13 finamiras.

La SSR vul daventar ina chasa da multimedia digitala ed elavurar cuntegns per tut las furmas decisivas da l'utilisaziun da las medias e tut las plattafurmas funcziunalas. Ella s'orientescha vi da la plivalur per las utilisadras ed ils utilisaders ed offra sias purschidas là, nua ch'il public sa chatta. Concretamain vegn la SSR a (selecziun) 

  • cumplettar la purschida per il public mobil, giuven ed urban e per persunas cun ina biografia da migraziun;
  • intensivar il contact cun las utilisadra ed ils utilisaders da las medias, cunzunt en las raits socialas. La SSR utilisescha online e HbbTV per interagir cun il public;
  • tgirar in schurnalissem independent e malcumadaivel che metta standards cun sia professiunalitad;
  • aspirar a cooperaziuns regiunalas, naziunalas ed internaziunalas;
  • surpigliar la responsabladad per la plazza da medias, per l'economia publica e per ina societad persistenta;
  • pratitgar l'innovaziun ed augmentar l'agilitad;
  • promover ina cultura d'interpresa digitala.

Cumpareglià cun versiuns precedentas metta la strategia d'interpresa novs accents: La promoziun da la democrazia, l'independenza da l'interpresa e la qualitad da las purschidas vegnan valitadas pli ferm. La SSR vul far punts tranter las parts dal pajais, las culturas, las generaziuns, las convischinas ed ils convischins svizzers ed immigrads. Sias reportaschas contribueschan a la chapientscha vicendaivla.

La strategia d'interpresa preschenta las finamiras ed il plan da termin per la realisaziun. Il cussegl d'administraziun e la direcziun examineschan las mesiras ed ils projects annualmain e las finamiras mintga dus onns. En cas da basegn vegnan ellas adattadas als svilups ils pli novs. L'onn 2018 vegn la strategia a vegnir revedida danovamain.

RSIRTRRTSSRFSWI