SRG SSR

Maletg directiv

Maletg directiv

Missiun

Nus infurmain, divertin e contribuin a la furmaziun ed al svilup cultural. Nus promovin la furmaziun democratica d’opiniuns, l’infurmaziun da la societad e l’identitad culturala. Per noss public derasain nus en las quatter regiuns linguisticas programs equivalents sut las medemas cundiziuns. Nus resguardain las spetgas da maioritads e minoritads e favurisain qua tras la chapientscha vicendaivla e la solidaritad. 

Visiun

Noss service public audiovisual è part integrala e spievel da la realitad svizra. Noss programs èn nunconfundibels e sa fan valair cun success envers la concurrenza internaziunala. Nus remartgain ad uras novs cumportaments dal public en il diever da nossas medias ed essan averts per l’innovaziun tecnologica. Nossas purschidas fixeschan la norma qualitativa e contribueschan a moda indispensabla a la coesiun sociala en Svizra. 

Princips 

  • Credibladad: Nus ans orientain tenor ils fatgs, infurmain a moda transparenta e preschentain las differentas opiniuns. Nus pretendain e promovain l'auta cumpetenza da nossas collavuraturas e da noss collavuraturs concernent il schurnalissem e la concepziun dal program. Nus purtain la responsabladad che nossas emissiuns sajan fidadas e lur cuntegns credibels.
  • Independenza: Nus elegian e furmain noss cuntegns independentamain da gruppas d’interess politics ed economics. Noss mandat da service public e las taxas da concessiun obligheschan nus da realisar la meglra qualitad en responsabladad envers noss public. Nus essan averts per critica, transparents per la publicitad ed ans suttamettain a controllas internas ed externas.
  • Diversitad: Nus concepin noss programs cun resguardar ils basegns multifars da las maioritads e minoritads en la Svizra plurilingua e multiculturala. La diversitad caracterisescha noss formats, noss cuntegns e nossa optica. Nus tematisain ils eveniments internaziunals e lur influenza sin la rolla ed impurtanza da la Svizra.
  • Creativitad: La creativitad è la premissa ed il motor da noss success. Nus promovain in clima avert per midadas tecnicas, socialas ed economicas. Nus sustegnain ideas e prestaziuns creativas da nossas collavuraturas e da noss collavuraturs per far frunt a la concurrenza da medias internaziunala adina pli dira.
  • Loialitad: Il respect da la dignitad umana è ina premissa essenziala per nossa lavur editoriala. En nossa activitad publicistica tractain nus ils conumans cun respect e fairness. Partenaris da fatschenta e partenaris socials pon sa fidar da nus. A nossas collavuraturas ed a noss collavuraturs offrin nus cundiziuns da lavur progressivas e quintain cun lur loialitad e lur engaschi per il service public.
Metro

Tge è l'incumbensa da la SSR? Tge signifitga service public? Las respostas a questas ed a bleras ulteriuras dumondas chattais Vus sin SSR Metro.

RSIRTRRTSSRFSWI