SRG SSR

Basas legalas

Basas legalas

Las cundiziuns da basa legalas da la SSR èn multifaras.

Organisada è la SSR sco in’uniun, pli precis ina corporaziun d'uniuns cun quatter commembras (SRG Deutschschweiz, SSR Romande, Società cooperativa per la Radiotelevisione svizzera di lingua italiana, SRG SSR Svizra Rumantscha). Decisivs èn pia il dretg d'uniun, ma per gronda part er il dretg d'obligaziuns, surtut quai che concerna il rendaquint. La SSR na vul betg far in gudogn. La constituziun organisatorica da la SSR fa part dals statuts da la SSR e da quels da sias societads regiunalas e da las disposiziuns d’organisaziun che sa basan sin quests statuts.

Sco interpresa economica suttastat la SSR l'emprim a las normas da cumportament rigurusas da la lescha davart radio e televisiun, da l'ordinaziun e da la concessiun. Per il rest sa differenziescha ella strusch d'autras interpresas. Ella suttastat al dretg da concurrenza, al dretg penal d'interpresa, al dretg da lavur, al dretg d’assicuranza sociala, al dretg davart la protecziun da l'ambient, etc. Cun in’excepziun: la SSR na suttastat betg a la Lescha federala davart la taglia directa, cunquai ch'ella è in’interpresa che na fa betg in gudogn ed ha in’incumbensa publica. Tut las autras leschas da taglia èn applitgablas, surtut la lescha davart la taglia sin la plivalur.

Per tut las interpresas da medias èn ils dretgs d'autur fitg impurtants, damai che l'activitad economica d'in organisatur da radio (e da mintga interpresa da medias) è d'acquistar dretgs d'ovras protegidas dals dretgs d'autur e da duvrar els confurm al medium. La gronda part dals dretgs d'autur cumpra la SSR da sias collavuraturas e ses collavuraturs. Quels cedan lur dretgs a la patruna tenor las disposiziuns dal dretg d’obligaziuns dal contract collectiv da lavur e dal contract individual da lavur. Per dievers commerzials per auters intents che la radiodiffusiun vegnan els indemnisads cun ina pauschala («fond da creativitad»). La SSR è la pli gronda utilisadra d'ovras existentas en Svizra; ella acquista ils dretgs correspundents surtut da las societads d'utilisaziun (SUISA, SSA, Pro Litteris, SUISSIMAGE e Swissperform). Ulteriurs dretgs cumpra ella directamain dals possessurs, per exempel da distributurs da film. La lescha davart ils dretgs d'autur regla er ils dretgs da protecziun parents.

La SSR è sco interpresa d'emissiun e producenta originarmain possessura da tals dretgs. Questa posiziun legala è impurtanta surtut en las relaziuns economicas cun las interpresas da derasaziun (administraturs da raits da cabel).

Metro

Tge è l'incumbensa da la SSR? Tge signifitga service public? Las respostas a questas ed a bleras ulteriuras dumondas chattais Vus sin SSR Metro.

RSIRTRRTSSRFSWI