SRG SSR

Legislaziun davart radio e televisiun

Legislaziun davart radio e televisiun

L'activitad da la SSR sa basa sin la Constituziun federala, sin la Lescha federala davart radio e televisiun (LRTV), sin l'Ordinaziun davart radio e televisiun (ORTV) e sin la concessiun da la SSR.

Constituziun federala

L'artitgel 93 da la Constituziun federala (CF) determinescha che la legislaziun davart radio e televisiun cumpeta a la Confederaziun. Radio e televisiun duain contribuir a la furmaziun, al svilup cultural, a la furmaziun libra da l'opiniun ed al divertiment, resguardar las particularitads dal pajais ed ils basegns dals chantuns, preschentar ils eveniments a moda correcta ed examinar adequatamain la diversitad da las opiniuns. Ultra da quai garantescha la CF l'independenza da radio e televisiun sco era l'autonomia en quai che concerna la furmaziun dals programs. Sco instanza dal fatg e da controlla prevesa la CF in'instanza da recurs independenta da las autoritads e dal Parlament.

Lescha ed Ordinaziun davart radio e televisiun

La Lescha federala davart radio e televisiun (LRTV) e l'Ordinaziun davart radio e televisiun (ORTV) fan cundiziuns generalas per l'organisaziun da la SSR. La SSR sto esser organisada uschia che sia autonomia ed independenza èn garantidas, ch'ella po vegnir manada a moda economica e coordinada resp. manada en in rom naziunal, ch'ils giavischs da las regiuns linguisticas vegnan resguardads, ch'il public è represchentà en l'organisaziun e ch'ella po vegnir manada tenor ils princips dal dretg d'aczias. Tgi che vul recepir programs da radio e televisiun sto pajar ina taxa da recepziun che vegn fixada dal Cussegl federal. Cun far quai resguarda il Cussegl federal:

  • il basegn per finanziar ils programs da la SSR e sias autras offertas publicisticas
  • il sustegn da programs concessiunads
  • las incumbensas en connex cun la dumonda da las taxas da recepziun e la realisaziun dal duair da s'annunziar e da pajar taxas
  • il sustegn da la fundaziun per la perscrutaziun dal diever
  • la construcziun da raits d'emetturs en il rom da l'introducziun da novas tecnologias


Concessiun

La concessiun precisescha l'incumbensa che la SSR ha d'ademplir cun tut ses programs da radio e televisiun sco era cun autras offertas publicisticas. En il sectur da radio porscha la SSR:

  • mintgamai trais programs per la regiun linguistica tudestga, franzosa e taliana
  • in program rumantsch
  • in program modifitgà per la regiun linguistica tudestga e franzosa (in program modifitgà surpiglia il caracter fundamental ed ils cuntegns dal program da basa, sa distingua dentant tras in agen «tarpun da musica»)
  • in program da giuvenils per la Svizra tudestga
  • mintgamai in program da musica classica, da jazz e da musica da pop
  • in program d'infurmaziun tudestg


En il sectur da televisiun porscha la SSR:

  • mintgamai dus programs per la regiun linguistica tudestga, franzosa e taliana en qualitad da HDTV
  • emissiuns per la regiun linguistica rumantscha
  • in program da repetiziun tudestg
  • ina offerta in franzos cun infurmaziuns actualisadas permanentamain ed indicaziuns davart il program en l'internet
  • emissiuns davart eveniments politics, economics, culturals e sportivs d'impurtanza per la regiun linguistica u per tut il pajais da maniera originara en l'internet


L'offerta online da la SSR cumpiglia:

  • cuntegns online cun in rapport ad emissiuns (rapport direct, temporar e tematic ad emissiuns u a parts d'emissiuns redacziunalas)
  • cuntegns online senza in rapport ad emissiuns sco contribuziun da text en las spartas novitads, sport e regiunal/local (limità a maximalmain 1000 segns per contribuziun)
  • infurmaziuns da basa e da context davart las emissiuns
  • infurmaziuns davart enconuschientschas da basa en connex cun las emissiuns instructivas
  • forums dal public e gieus colliads cun las emissiuns
  • in servetsch online pluriling per l'exteriur (Swissinfo)
  • in servetsch online per il public da lingua taliana damanaivel dal cunfin (tvsvizzera.it)


La concessiun fixescha ultra da quai che la SSR contribuescha cun ses programs e sias ulteriuras offertas publicisticas:

  • a la furmaziun libra da l'opiniun dal public cun in'infurmaziun cumplessiva, multifara e correcta surtut davart connexs politics, economics e socials
  • al svilup cultural ed al rinforzament da las valurs culturalas dal pajais; a la promoziun da la cultura svizra considerond en spezial la litteratura svizra sco era la lavur musicala e cinematografica en Svizra
  • a la furmaziun dal public, surtut cun emetter regularmain emissiuns da cuntegn instructiv
  • al divertiment
Metro

Tge è l'incumbensa da la SSR? Tge signifitga service public? Las respostas a questas ed a bleras ulteriuras dumondas chattais Vus sin SSR Metro.

RSIRTRRTSSRFSWI